溫室效應，一個恒久存在，但大家又漠視的問題；香港夏天一年比一年長又熱、中亞嘅持續沙漠化，還有歐洲嘅水災和美洲嘅連場颶風！綠色環保有如魔咒般掛在口邊，但另一邊廂石油創新高50美元一桶，大家又甘之如飴照買、照用，放其CO2！睇完《明日之後》，大家將會反省到破壞地球生態的「代價」，絕不只上述之數，種種天災之害可能只是前奏，到「終極」本利歸還時，以理性科學分析，不熱反凍竟然是下一個冰河時期；地球之反噬，大家絕對付不起這筆帳！
記者：朱崇德
論今年睇過最好之戲，《明日之後》絕對入頭三之列，起初吸引筆者是他的龍捲風、颶風、冰雹及冰雪等特技效果；看畢全片，讓大家親眼預視大自然反撲的整個過程，當真發人深省！DVD版另一吸引之處，當然是收錄了大家期待已久嘅「天災」MakingOf！本住「救一個得一個」心態，多一個人睇，多一個人學曉愛惜這個地球！
區碼：3區
發行：得利影視
上過戲院睇《明》嘅人，對住「水淹冰封曼哈頓」一幕，都異口同聲只有三個字「點拍㗎？」，買呢隻DVD除咗為套戲，另一原因就係呢個Making，不負所託，解釋好詳盡，原來全以CG拍攝，大家又冒起三個字：「真成咁！」；此外刪剪片段亦值得一睇，裏面有一段沙灘邊滑浪屋被吹起，從未曝光；另外《明日科學》是一段以科學角度，講解現時的溫室效應及海洋水流對氣溫轉變的影響，戲內引起冰河時期原因睇極唔明？呢度有專家作更詳盡講解！
故事講述氣象學家霍爾教授，在一次南極冰棚考察中發現冰蓋崩解，警示到「溫室效應」帶來的全球暖化，將引發地球空前災難，因為大量淡水溶入海洋導致「海洋水流」的調溫作用喪失殆盡；先是新德里的熱帶降雪，接着是冰雹襲東京，及龍捲風空降人煙稠密的洛杉磯，但極端反常天氣只是前奏，在毫無徵兆之下，全球將踏入一個新冰河時期。
論視覺衝擊，《天煞——地球反擊戰》導演羅倫艾默烈治在《明》真係做得非常到家，龍捲風的實質感絕對比當年的《龍捲風暴》有過之而無不及，加上今次是在鬧市正中心「引爆」，車、屋橫飛，龍捲風所過之處風捲殘雲，將CG影像技術再推進一大步！
全劇戲肉在紐約曼哈頓的海嘯加冰封！洶湧澎湃的水牆正面襲擊整個城，全靠使用先進的「光測與雷達」技術，利用電磁波來精確測量距離與遠處物體的特性，再模擬出曼哈頓13條街的詳細結構地圖，所以像真度100%，絕對是電影史上從未有過的超真實體驗。
