喺新一屆立法會退下火線嘅民主黨成員羅致光（圖）同競選連任失敗嘅衞生服務界麥國風，要執埋手尾告別議會。八方收到佢哋最後一份工作報告，麥國風言簡意賅，只係話多謝支持，無言感激，透露重返葵涌醫院做部門運作經理外，日後計劃深造提升專業水平。
羅致光就比較感性，話從政多年一直保持低調，冇乜市民認得出佢，但估唔到「晚節不保」，今年因為擔任調查沙士事故委員會主席而經常曝光，結果出街時唔少人同佢握手甚至要攞佢簽名，佢話正期待市民忘記佢嘅日子來臨。
立法會議員被加上「尊貴」銜頭，羅致光就話其實好怕「尊貴」兩個字，因為人哋叫你「尊貴」議員即係想窒你，佢認為議員係咪「尊貴」，視乎自己係咪尊重別人，否則點叫都冇意思。
同好多告別立法會嘅議員一樣，羅致光話最懷念立法會個停車場，因為位處中環心臟地帶，泊低架車搭地鐵去邊都好方便。八方就覺得停車場唔使收費先係主因，大家都知中環泊車幾貴幾難㗎啦。
傳真︰2623-9278
電郵︰