唔知由幾時開始電影內的配角喜歡用有知名度的藝人客串。呢個情況外國電影都有，但係香港影圈就特別奇怪。
通常一部電影就梗係有男女主角，男女配角再加上其他好多唔同嘅角色人物組成。咁呢啲角色人物通常都係人嚟嘅，所以一部電影決定開拍之後導演就要開始去搵人。搵人嘅方法有好多種，最好嘅方法當然係搵合適嘅演員去做合適嘅角色，不過我哋通過試鏡可以挑選嘅職業演員實在數量太少，絕大部份經過所謂特約演員公司搵番嚟嘅人都未受過正式演技訓練，有啲重係甩皮甩骨，古靈精怪，非人類嘅幻想能力可以估計。
另一個問題係大部份製作上嘅資金已經係用晒喺主角嘅身上或者根本係冇錢拍嘅，所以就算你搵到人都未必有錢請佢。又通常投資嘅老闆同導演都係貪心嘅，所以成日都會幻想：「咦，如果呢場戲男主角喺廁所撞見嗰個人係劉德華做就好啦，又或者去完廁所出嚟經過男主角身邊嗰個係梁朝偉就更加冇得頂呀！」當然劉德華同梁朝偉都唔會睬你。我相信唔會有人咁儍夠膽去問。
咁喺冇錢嘅情況下唯有開始諗到同你Friend嘅明星，又或者係一啲冇咁高知名度但係你覺得叫佢嚟演個角色就唔使畀錢都得，重會自備戲服就最好喇。所以𠵱家流行一開戲就開始吹雞，總之唔理啱唔啱，認得樣嘅就叫佢嚟，永遠都係同佢哋講：「今次幫幫手啦，我下部畀你擔正㗎啦！」
我覺得以上嘅諗法都係環境迫成，真係無可厚非。希望有一日電影圈可以健康啲，唔使次次開戲都要吹雞，拍膊頭，演戲係一個工作，工作係應該有合理嘅報酬。作為觀眾我又唔覺得一部戲有一百個明星客串會好好睇。