記得我偶像伍晃榮報道過世界越野錦標賽（WorldRallyChampionship），睇到唔同嘅賽車喺越野賽道上凌空飛馳、跣胎甩尾。估唔到早前北海道之行，除咗可以企喺賽道旁邊親身感受賽車滑過後飛沙走石嘅場面，竟然有幸可以坐到由日本站冠軍PetterSolberg揸嘅戰車……從此以後，我對玩過山車再無興趣了。
記者、攝影：朱維達
香港人大多對世界越野錦標賽（WRC）無太多認識，更加未必聽過PetterSolberg，我都係，所以無諗過扮專家介紹，不過以一個對呢類賽事充滿好奇兼有絕對新鮮感嘅我嚟講，有幸坐到由PetterSolberg揸嘅WRCar，感覺確係一流。
北海道帶廣的十勝是出名的溫泉區，富士車廠在其位於郊外的TokachiInternationalSpeedway附近搭建了臨時帳幕及修理站，由富士其中兩位著名車手親自接載各傳媒兜一轉，話「接載」倒不如話係去片車，每次車手抑或乘客坐車前都先要穿上由頭笠到腳嘅保護衣，戴上連通話器的頭盔，由多位工作人員check過所有零件運作如常後，Solberg一句：I'mready！其他人就即時散開，繼而就係一記猛烈嘅後撞力！
雖然戴咗頭盔，但300匹嘅動力從引擎處爆發時依然聽得好清楚，其震撼力就好似前日睇煙花一樣，加埋沙石被捲起撞擊車底，相比香港一班裝粗喉turbo偈嘅愛飛一族喺旺角招搖過市，真係高三班！
不過最High嘅都係掟彎時，睇到隔籬位Solberg好似魔術師咁，單手扭軚，另一隻手拍兩拍支Sequential直推式波棍十足表演一樣，雖然入彎時速相信不過90公里，但亦盡顯功架。至於我，縱使坐喺張跑車桶椅，緊扣上一體式安全帶，感覺亦好似坐過山車一樣，左搖右擺、凌空飛起，五臟六腑隨住車身搖擺混為一體，真唔明平日比賽啲Co-driver重可以悠然自得攞住張賽道圖導向主車手。事後Solberg問：It'sfunny？我苦笑：Absolutely～
今次北海道之行除咗可以親身感受Rally嘅風馳電掣，重可以試試同款車系性能，當然，我試嘅只係LegacyB4（另有其他新型號如ImprezaSTi同、WRX），試車場分別係擺有雪糕筒的細場及跑車賽道，前者可以集中體驗箇中嘅扭力表現，後者則可以在轉檔及高速掟彎時感受一下順暢及穩壓性，事後發覺，就算揸住部+/-波嘅B4高速入彎都一樣咁好劈。
離開香港揸住廠方畀傳媒測試嘅富士新型號，再唔使驚畀差佬跟，可以無懼超速，踩到盡、劈行油入彎，正當覺得手車了得之時，輪到專業車手表演時，喺唔夠一個足球場咁大嘅範圍內打咗十幾個白鴿轉，情形就好似玩溜冰咁，加埋混合由輪胎與地下摩擦煙霧瀰漫嘅場景，真係大開眼界……雖然代價係滿臉油屎。
■喺唔夠一個足球場咁大嘅場地，專業車手用盡每一寸地方作沿地甩尾示範，煙霧瀰漫中見真章。
○記者 ●PetterSolberg
○日本賽道同其他賽道最大分別喺邊度？
●日本賽道有好多變化，例如啱啱落完雨嘅地下變得泥濘，令到賽道更加起伏，而且有好多睇唔到嘅死位，車速愈快就會愈危險，唔可以有1厘米嘅偏差。
○你對於餘下嘅賽事有咩睇法？
●其實餘下嘅賽事乜嘢事情都可能會發生，WRC唔只係鬥力量，我覺得最緊要係狀態同信任你嘅副手，再加一點點運氣，最後就係要冒一定嘅風險，呢啲先係致勝元素，我對餘下嘅賽事絕對有信心。
註：個人排名升上第二的PetterSolberg，現還有四站賽事。
