噚日朝早，ＣＮＮ播咗個賭王何鴻燊獨家訪問，果然俾八方估中──雷聲大雨點小兼可以當娛樂新聞咁睇！老而彌堅嘅何生話自己雖則身為賭王，但一生人從來唔賭，重從來唔相信命運。佢又話自己冇養生秘密，只係每日游水、每星期打兩次網球，總之運動係最重要，暫時佢重未諗到退休呢個課題。
噚日佢旗下間澳門博彩股份又多一間賭場開幕，賭王亦有出席主持開幕儀式，佢重話受惠於自由行，澳門遊客日增，會爭取喺今年內再開多三間賭場。
另外，ＣＮＮ訪問又講到佢細個嗰陣點家道中落、點奮鬥，但只係一句起兩句止（詳情大家其實睇番好耐之前劉德華主演嗰套《新哥傳奇》重清楚），之後又講到佢家庭同私生活。有４位太太嘅何生話，「mylifeisreallycomplicated」，但係自己處理得好好、對啲仔女供書教學做足晒老竇本份，但就冇講到周旋喺４位太座之間嘅成功之道，最有睇頭係訪問尾聲，就係負責訪問嗰個LorraineHan（即係以前明珠台個女主播）同賭王嚟番partchacha，唔知重以為賭王第5位太太新登場呢！
傳真︰2623-9278
電郵︰