黎明和樂隊PingPung昨天到尖沙嘴出席活動，黎明的歌迷一早到場排隊。當偶像離開時，Fans更重重包圍黎明的保母車，最後要警方出動，黎明才可以順利離開現場，不過歌迷仍不放棄，狂跑追車。
黎明和樂隊PingPung昨天到尖沙嘴的一間唱片店，出席該公司的周年慶祝活動。大會透露黎明推出的新唱片銷量甚佳，已經連續兩星期佔據該店的唱片銷量流行榜冠軍。
昨天黎明到鬧市，十足皇帝出巡，一早已吸引過百歌迷在店外等候。而活動期間，途人為觀看店內情況，更一度爬上欄杆。活動完畢後，歌迷不分老嫩，在大廈出口苦候偶像，把街道擠得水洩不通，更需要由警員到場調解，擾攘多時，黎明的座駕才可以順利開車，可惜歌迷仍狂跑追車。
問黎明可會為新碟舉行慶功宴，他卻說：「唔會，我寧願休息吓。之前又去外地拍戲，啱啱先適應番香港嘅天氣。噚晚國慶放煙花，我喺屋企一邊睇吓煙花、一邊睇吓電視，點知個人搞搞吓好眼瞓。其實我冇擔心過唱片成績，我做嘅嘢已做晒，已向自己交代咗。」
對於歌迷如此熱情，問黎明可會舉行簽名會或握手會，他說：「我冇搞過簽名會或者握手會，好似冇必要夾硬谷銷量。但係我好贊成新人搞簽名會，以前我冇做，錯過咗。」
此外，PingPung的歌曲《愛是最大權利》被指有抄襲日本歌曲之嫌，主音Kary表示不知情，而該歌曲的作曲人Jerry則說：「其實每首歌都係七粒音符變出嚟，有相似無可厚非，所有歌都係我哋四個人共創，冇可能抄襲，不過我都會買張唱片聽吓似唔似。」
採訪：王連連
攝影：陳偉權
