董班子吹雞拉大隊去北京，拒絕隨波逐流嘅詹培忠（圖），就扒逆水，用視察赤柱監獄，嚟提早履行議員職責兼賀國慶。
肥詹衣錦榮歸，憑議員身份，懲教署梗係冇人敢呼喝，出動有花名「成龍」之稱嘅副署長陳港生（成龍原名就叫陳港生）高規格出迎。肥詹開門見山指示：監倉應該提高「汁政能力」，即係改善囚犯嘅伙食管治水平。
肥詹又站喺中國文化嘅高度指出：赤柱囚犯嘅西餐，烹調成本較高，而中餐就受到歧視。但好多囚犯都想食中餐，故此希望懲教署提高囚犯中菜嘅質素，做到中西並重。
面對肥詹指示，陳署長點頭稱是。肥詹跟住同囚犯代表親切會見，跟住又想走去探佢嘅「Fan屎」葉繼歡，可惜歡哥經已瞓着咗。八方聽過一個古仔，話肥詹喺赤柱時，同歡哥同倉，有次歡哥求教：「炒股票係咪好易發達？」肥詹答：「千祈唔好制，炒股票呃人㗎！」其實好多年前，肥詹已講炒股票唔會發達，印股票至會；大家都咁猛料，佢冇點葉繼歡。
傳真︰2623-9278
電郵︰