馮仁昭前晚去咗順德一個度假村搞嘅啤酒節慶祝活動，大會請咗陶大宇、袁潔儀同許志安嚟表演。其中大宇同袁潔儀非常親民，雖然唱得冇歌星安仔咁好，但就冧到成千觀眾好開心，反而安仔得到嘅反應就冇咁好。
大宇自度遊戲同觀眾玩，佢請咗個女觀眾上台鬥長氣，見佢好細心咁拖住個女仔上台同落台，搞到班觀眾咿嘩鬼叫。大宇重預備咗成批間尺送畀人，而啲觀眾就猛嗌佢喺《青出於藍》裏面嘅角色「曾sir」。
袁潔儀亦唔執輸，當佢請一位四眼觀眾上台合唱時，就猛叫人做佢一晚情人，電到對方暈陀陀。點知到壓軸嘉賓許志安出場時就唔同晒，安仔唱完三首歌就走，雖然佢都算落力，但就冇咁親民，台下觀眾亦都冇大呼小叫咁熱情！
此外，安仔噚日喺山頂出席「2004心連心慈善步行及十周年慈善繽紛嘉年華會」，身為「兒童心臟健康大使」嘅安仔話平時都有跑步做運動，身體非常健康。
組合EO2噚日喺旺角演出「勁BandHipHopDance賀國慶」，佢哋會喺呢個月十號參加三項鐵人賽，所以呢排好勤力練跑，重已經訓練咗成三個禮拜，但就因為對手太強，所以冇乜信心攞獎，佢哋話能夠完成比賽已經唔錯。而成員Osman就話之前踩單車練氣時，唔小心炒車，結果搞到兩隻腳傷晒。咁大犧牲，馮仁昭希望佢哋比賽時有唔錯表現啦！
林文龍噚日去馬鞍山拍劇，佢話屋企失竊已經係個幾兩個月前嘅事，損失咗近一百萬嘅財物。不過文龍話最唔開心嘅係唔見咗一啲有紀念性嘅飾物，好似第一隻送畀太太郭可盈嘅表同結婚戒指等。佢話個賊係喺海邊爬入房，整爛咗主人房隻窗再撬爛埋個櫃鎖偷嘢。經過呢件事後，文龍已經花咗大約三萬蚊裝防盜同夾萬，管理處都派咗個保安喺海邊巡視㖭！
台灣一直有傳伊能靜有個家姐嫁咗畀台灣黑社會大佬「狗六」，最近當地通緝犯薛球被遣返台灣，傳聞同薛球關係密切嘅狗六成為焦點人物，結果噚日狗六亦落網。噚日伊能靜話：「六哥係我姐夫。」佢話家姐嫁咗畀六哥好耐，兩姊妹都以為佢只係生意人，不過佢話最重要都係姐夫對家姐好，家姐亦好愛姐夫咁話！
徐熙媛（大S）同徐熙娣（小S）噚日同蔡康永喺台灣出席由佢哋配音嘅迪士尼動畫《超人特攻隊》（Mr.Incredible）記者會。大S幫「超能先生」嘅老婆「彈力女超人」配音，而蔡康永就話佢個角色「衣夫人」係個成日批評名模同參加時尚派對嘅賤女人，佢話：「台灣時尚派對中就有很多呀！」經常參加派對嘅大S就好尷尬咁笑，咁大S咪識好多呢類女性？
