赴英領獎遇樂迷抗議
珍納積遜被柴台強顏歡笑

表揚黑人音樂嘅MOBO音樂頒獎禮前晚喺英國倫敦舉行。雖然英國女歌手Jamelia同男歌手KanyeWest都攞到三個大獎成為風頭躉，不過好多巨星都臨時甩底，令頒獎禮大為失色。而場外更發生咗段小插曲。話說門外有三十個抗議人士，一見嘉賓行紅地氈時就係咁噓，其中被噓得最勁嗰個就係特登飛嚟英國嘅珍納積遜（JanetJackson）。

群星放飛機
原來早前有人投訴MOBO大會將兩個唱歧視同性戀歌曲嘅歌手ElephantMan同VybzKartel列入提名名單，大會惟有取消呢兩個歌手嘅提名。點知前晚一個名為黑人音樂議會嘅組織喺門前抗議，話大會歧視呢兩個reggae歌手喎，所以當珍納積遜一經過紅地氈嗰時，就俾人狂噓，佢咪惟有死死氣咁強顏歡笑囉。
而前晚個頒獎禮可以用一鑊泡嚟形容，原本答應出席嘅巨星如BeyonceKnowles、Usher、AliciaKeys、Jay-Z等等，喺前幾日逐個話唔嚟，搞到個騷冇巨星撐場，黯然無光。好彩Jamelia前晚以一件Dolce&Gabbana開胸晚裝到場點綴一下，當晚佢亦不負眾望，攞到最佳MV、最佳單曲同埋最佳英國歌手獎，而美國嘅KanyeWest亦得到最佳饒舌歌手、最佳監製同最佳大碟獎。至於特登飛嚟英國頒個終身成就獎畀AnitaBaker嘅珍納積遜，自己亦得到名人堂大獎。不過Anita事前亦發爛渣，因為嫌棄頒獎嘉賓珍納積遜喎。