前日搞咗成日嘅國慶觀禮團，雖然來去匆匆，分分鐘連胡溫個樣都未睇清楚就要走人；但呢啲見領導人嘅機會難得，再加埋五個政治局常委出晒嚟，梗有人擔櫈仔，霸頭位，等同胡、溫握手，諗住做江握手第二。所以班貴人同領導合照，引起八方注意，睇住新華社發相嘅次序，估下有乜人喺第三屆特首跑馬仔遊戲領先。點知新華社夜一夜先發相，只係出咗范太、曹其真、林瑞麟同譚伯源。
有人話范太同胡錦濤握手握得最耐，又有偈傾，今次重有新華社出相，怕且行情看好。但又有人話，范太同曹其真分別係港澳立法會主席，所以有得發相，因為如果用出鏡呢個邏輯分析，噚日中央台出咗「黃中指」黃宜弘同胡主席握手，咁唔通又走去煲黃中指做特首候選人？而且如果連林瑞麟都有份，八方怕冇人肯陪佢跑喎！
若以大合照企位嚟講，最正非孫公同李國章莫屬，喺正胡溫後面，佢哋當然有得同領導握手；可憐嘅田北俊，就因為埋位遲，企喺後面，錯過咗握手機會。
不過有人仆倒去，但都有人唔見影。個二百幾人觀禮團除咗唔見班「大孖沙」之外，由金管局任總以至一眾監管機構阿頭都冇咗影，金融工商界嘅官亦巧合地留晒堂，有人話可能胡、溫想搞親民作風，消滅商人治港嘅印象，所以大孖沙、金融佬冇份。都好，班有錢佬身嬌肉貴，唔少都上咗年紀，叫佢哋早機去，天光機返，真係攞命，實在難以奉陪。
八方攞番五年前五十周年大慶時嗰特區觀禮團名單比較一吓，當年有李嘉誠、李兆基同任總，警務處處長許淇安都有份；今年嘅班數明顯低晒，李明逵又留喺香港都唔上京，唔知搞乜鬼？
傳真︰2623-9278
電郵︰