阿胡坐定個王位，即時高調召見董團夥及「各界」二百餘人，在北京發出指示，話要在「愛國愛港」之大前提下「團結起來」，包括「某些問題有不同意見」人士。跟住阿胡口誦三句偈語：「抓住機遇謀發展，同心同德求穩定，包容共濟促和諧」。
開完四中全會，阿胡話，香港問題係一個「嶄新課題」，嶄新課題，至少要少少嶄新嘅語言、標語、廣告句。不過，睇番阿胡呢三句嘢，有乜嶄新之處？就令人𢱑晒頭。「抓住機遇謀發展，同心同德求穩定」，由矮仔鄧至肥佬江，由白頭魯至叛國出走嘅許家屯，十幾年來不知講過幾多次？講過之後又點？呢三句嘢，係咪可以打救香港嘅靈符？
「抓住機遇謀發展」──中國經濟改革，珠三角開放廉價勞工市場，香港啲商人唔使胡溫叫，都一早就識得「抓住機遇」，將啲廠搬晒上深圳東莞謀發展。結果就搞到廠家如唐唐、田少等就賺到騎騎笑，香港勞工冇工開。商家有得發，香港打工仔就愁眉難展，請問阿胡，有乜解救？
「同心同德求穩定」──呢句最好首先講畀廣東省衞生廳知。舊年沙士大瘟疫廣東首先爆發，港方衞生署第一時間向大陸粵方索取醫療資料，點知遭到粵方拒絕，結果葬送三百條人命！
香港衞生署想同心同德，共抗災疫，不過大陸啲衞生廳就離心缺德，有陳馮富珍供詞為證。阿胡咪淨係識得省董團夥，訓吓佢自己班幹部吖？
「包容共濟促和諧」──咁就更加好笑。老左土共、維園惡伯，長期謾罵五十萬示威人士唔愛國，咁又有冇「包容」？喺香港周不時搞起「愛國論」、「港獨論」，挑撥中國政府對民主派仇恨，何來和諧？候選人何偉途上東莞，涉嫌做咗一啲好多中年港男包括差人鍾意做嘅事，點解東莞公安唔「包容」吓，判勞改六個月？
董團夥削綜援，又點樣同窮人一齊「共濟」？
吟詩外交，口號治港，似乎都係胡溫心頭好，睇嚟二百幾個小學生上北京，換咗個班主任，讀嘅都係同一套課本矣。
傳真︰2623-9278
電郵︰