由馮德倫執導嘅《精武家庭》前晚喺海逸酒店舉行記者會，出席嘅演員包括有何超儀、成龍、吳彥祖同Twins，而武術指導袁和平亦有出席。阿Sa俾記者問起謝霆鋒同張衞健疑假戲真打王伯昭一事，佢就回應話：「件事唔係好了解，好難評論，但之前我同健仔合作，要摑健仔，佢叫我大力啲摑，重NG咗五次，所以有時用力大咗，一啲都唔奇。」
有記者問導演馮德倫點解今次冇預女友莫文蔚演出，佢就話：「部戲係講單親家庭，唔係講愛情，所以冇乜角色啱佢做，中秋節我哋都冇一齊過，因為我哋都要返屋企過節。」何超儀就話拍呢部戲要應付好多武打場面，所以呢一兩年都唔會生BB，因為佢想專心行打女路線。
另外，成龍個仔房祖名張碟出咗之後，只係賣咗幾千張，成龍就話：「最好冇人買，等佢唔好以為一出道就可以平步青雲。」
林嘉欣噚日去咗灣仔藝術中心出席由詹瑞文主持嘅「生活藝術——戲劇減壓」記者會，林嘉欣原來跟詹瑞文學戲已有兩個多月，佢話：「我本身好欣賞佢做戲，我覺得佢連個嘴都好似識得做戲咁，如果有時間我會繼續跟佢學戲。」而詹瑞文亦大讚林嘉欣有做戲天份。
馬浚偉同前輩葉麗儀下個月中先後喺多倫多同美國開演唱會，其中喺多倫多嗰站，重會有由二十一人組成嘅管弦樂隊同流行樂隊伴奏㖭。原來馬仔呢次已經係第二次同葉麗儀合作，今次佢提議同對方合唱《帝女花之香夭》㖭，馬仔重讚葉麗儀唱歌時有用不完之氣，令佢非常佩服。
李彩樺（Rain）日前已經正式同經理人黃柏高（Paco）解約，聽聞阿Rain要賠償三十萬畀Paco贖身，其中包括Paco要佢買番已經錄音但未推出嘅歌，每首歌都要成萬幾蚊，十幾首歌加埋就要成廿萬。噚日馮仁昭同阿Rain傾開，佢話同Paco係和平解約，覺得Paco要佢買番啲歌都係合理。
余文樂噚日喺將軍澳電視廣播城客串《赤沙印記@四葉草.2》，扮一個去咗捐血嘅途人，樂仔話：「叫我拍戲去捐血都可以，如果真係去捐就唔好嘞。我做學生嗰時捐過一次血，捐完之後會頭暈，可能係我貧血啦！同埋自己知自己事，無謂捐啲唔好嘅血畀人，如果真係要做好事，我情願做多啲義工。」
好耐冇同大家見面嘅陳美玲噚日去咗商台接受訪問，原來佢上年年底推出咗一隻碟，全碟以爵士音樂為主。對於時下歌手不時被批評咪嘴唔專業，身為前輩嘅陳美玲就好體諒佢哋，重話係因為音樂技術進步先令到歌手唱唔到現場喎，但係佢就勸年輕人應該諗清楚唱歌係咪佢哋嘅志向，唔好隨便浪費青春。
