由瀧澤秀明主演嘅NHK電視台古裝劇《義經》早前已經開拍，並將會喺下年播映。不過新劇未播就已經是非多多，據日本雜誌《週刊文春》報道，劇中兩位女角上戶彩同後藤真希經常喺拍攝時鬥氣，搞到男主角瀧澤秀明同幕後工作人員好頭痛。
據工作人員爆料，同樣係十九歲嘅彩妹同真希喺第一次拍攝時已經產生摩擦。事緣當日彩妹雖然一見真希就大讚佢可愛，又話自己好羨慕佢，點知真希唔領情，重話彩妹好假喎。有次工作人員問真希鍾意邊類型男士時，佢就答係彩妹嘅緋聞男友森田剛；工作人員再問彩妹同樣嘅問題，彩妹諗都唔諗，即刻答係真希嘅前度男友、偶像組合NEWS成員森內貴寬。
唔單止咁，彩妹話唔肯同真希食同一樣嘅飯盒，又唔肯畀真希先入廠。真希亦不甘示弱，經常喺人面前講彩妹壞話。佢哋嘅鬥氣行動繼續升級，最終禍及主角瀧澤。有日瀧澤見到穿上綠色戲服嘅真希時，就大讚真希可愛；點知咁啱俾彩妹聽到，本來要着紅色戲服嘅彩妹立刻要求換綠色衫，事後工作人員惟有叫瀧澤再讚一讚彩妹，費事搞到佢心情差唔肯拍劇，睇嚟瀧澤今次都有排頭痛嘞。