昨日季結，唔少股票櫥窗粉飾，mark價情況相當嚴重，唔好話細價股，就算基金股都一樣齊齊mark，情況好熱鬧。不過，小初噚日冇手多，因為今日係國慶假期，加上外圍市況唔明朗，都係少做少錯。
噚日國企股升勢凌厲，齊齊炒高賀國慶，原材料股升幅驚人，不過最近一直被睇淡的大陸汽車股，股價雖然冇乜點跌，但亦唔見得有勢，惟獨一隻與汽車行業關係密切的濰柴動力（2338），股價持續上升之餘，又再獲外資大行青睞。
濰柴昨日升6.76%，收15.80元，係近期高位，成交股數262萬股，金額4074萬元。
濰柴日前公布，打算收購杭州汽車發動機廠資產，並已支付8000萬元人民幣訂金。
經紀黃話，有分析員睇過話覺得掂，皆因收購可以增加濰柴的市場份額，長遠對盈利有正面貢獻。
此外，在原材料價格持續上漲的情況下，分析員認為濰柴係少數有本事控制成本，以及將成本轉嫁畀客戶的企業，故此受到芬佬睇好。
慕容小初