油價回落，股市回升，恒指一升就係169點。成份股中都有3隻下跌，佢哋係太A（019）、德昌（179）同利豐（494）。
太AC輪：太A收54.25元，跌1格，同9月中頂位58.50元比較，調整幅度近9%。油價上升，打擊航空業務，太A有航空質地，近期冇法子唔受影響。不過太古上半年盤數靚爆鏡，賺29.52億元，增幅1.5倍。油價影響告一段落之後，太A重建升軌大有希望。
太A嘅C輪5件，3件係X輪，啲實際數據好難計，其餘標準輪有4506與9873。4506明年3月到期，輪價42仙，溢價12.8%，槓桿率12.9倍（有效6.2倍），引伸波幅34%，數據唔算特別吸引，但勉強都可以諗吓。9873壽命有限，溢價稍高，諗唔過。
利豐C輪：利豐收11.20元，唔見10仙，前周最高12.05元，跌到咁上下，有技術性反彈機會。利豐有4隻C輪，全部標準貨色，昨日冇一隻有成交。幾乎全部啲數據都睇唔上眼，利豐C輪冇得炒。正股若然跌多些少，直接買正股博反彈好過。
德昌C輪：德昌收7.65元，跌1格。美國經濟若然好轉，德昌有機會向上彈番些少，不過盈利高增長期已過，要好似幾年前咁長升長有，唔容易。耐唔中見德昌跌得急一啲，揀C輪耐唔中博反彈，9533勉強可以考慮。隻輪明年1月到期，輪價54仙，溢價10.1%，槓桿率14.2倍（有效6.8倍），引伸波幅41%。
章盛