今日係十．一國慶，八方收到1010短訊，有國歌鈴聲可供下載，收費六大元，唔使等電視播，隨時有得聽。照計國旗國徽有法例保障，點解國歌任人玩，真係莫名其妙。
十．一國慶，慶祝祖國解放，窮苦老百姓翻身當家作主，過幸福生活。不過，特區政府就揀正國家五十五周年大喜日子，向老弱傷殘嘅市民開刀，再削百分之五點四綜援，又係莫名其妙。
唐英年同屋企人上京過中秋祝國慶，前晚一齊天安門廣場漫步。呢位財神重喺人民大會堂門口唱高調，話政府要以民為本，又要收支平衡，之間要取捨；重叫大家先問自己可以為香港作出乜嘢貢獻，再問政府可以做乜。敢問司長，要滅赤，除咗削綜援，係咪真係冇晒其他途徑？
董先生當選時，信誓旦旦，話以儒家精神治港，老有所依，老有所養。乜儒家唔係講仁愛㗎咩？香港雖然經歷衰退，仍屬富裕社會，使唔使對最需要照顧嘅人咁刻薄？點解高官減薪就六個巴仙、重分三年減，綜援一刀切減逾一成？呢個政府公道何存？
傳真︰2623-9278
電郵︰