楊千嬅早前在大球場演出奧運節目時，自言因聲沙才要咪嘴，前晚她為新城台慶演出時，卻謂不想呃秤，堅持唱現場；祖兒則因聲沙，事先張揚在國慶騷前的演出都會咪嘴。
楊千嬅、容祖兒、關心妍及郭富城等前晚在尖沙嘴出席《新城台慶群星滿FUN騷2004》，近來眾歌星演唱時都着重是否唱現場，千嬅早前曾自言聲沙才咪嘴，前晚她獻唱《小城大事》時現場播放咪嘴音樂，千嬅唱了兩句即喊停，並說：「等等先，停音樂，點解會咁㗎？唔可以咁呃秤，𠵱家好敏感，好驚呀。」工作人員隨即播放音樂讓她表演。
之後千嬅接受訪問時說：「咪嘴嘅話題咁敏感，出到嚟冇理由呃人秤嘛，歌手唔可以掛住做宣傳同做騷，都要顧吓唱歌，但我試過病，又想去外地見多啲歌迷，唱唔到咪要（咪嘴）囉。但我不嬲都唱現場，幾唔好狀態都唱現場，唱到啞都係咁啦！」
而容祖兒獻唱時卻咪嘴，她說：「我聲沙呀，嚟緊要做個音樂會同國慶騷，所以喺之前嘅演出我都盡量要（咪嘴），要養好把聲，我諗觀眾唔會針對身體不適嘅歌手，佢哋都唔想睇我唱歌唱到走晒音啦！」
前晚眾歌星與新城ＤＪ大合照後，眾ＤＪ竟然玩掟蛋糕，露芙與阿Bob首先發難，Boy'Z及薛凱琪慘成攻擊目標，站在台邊的關心妍在混亂中幾乎跌落台。
而郭富城曾表示甚喜歡「跳水公主」郭晶晶，他前晚表示在上海F1賽車時巧遇對方，當提到郭晶晶與霍啟剛的緋聞時，他說：「我唔知襯唔襯，交畀女方揀啦，女仔揀到自己鍾意嘅人咪得囉，鍾意嘅話邊個都幸福。」
採訪：王連連、駱華齡
攝影：仇志德
