大劉開P市民衝擊紅地氈　亂
星爺駕到上海靚女蟻摟糖

周星馳前晚出席劉鑾雄兩兄弟及鄭裕彤等人在上海投資的久光百貨開幕派對，大批睇熱鬧的巿民爭相走到星爺身邊要求握手，引起混亂，而其間更不斷有上海美女主動上前和星爺攀談。
本報記者RitaLeung、RockyHo上海直擊

劉鑾雄、劉鑾鴻兄弟（大、細劉）及鄭裕彤等投資的上海久光百貨開幕，前晚在百貨大樓三樓舉行盛大派對，周星馳亦有到賀，星爺約在九時多到場，大、細劉均出門迎接，由於現場保安效率欠佳，大批睇熱鬧的巿民竟可衝入紅地氈，走到星爺身邊要求握手，引起大混亂。

章小蕙變賣身外物
之後星爺及大劉等人在十多名保安包圍下向前行，不過保安卻十分粗暴地向巿民和記者批踭，及大力推撞，星爺亦為之愕然。而星爺在到達ＶＩＰ房時，即大受在場女士歡迎，其間不斷有上海美女上前主動攀談，而大劉愛將陳凱韻亦與星爺言談甚歡。
章小蕙前晚入場時亦引起哄動，問她到上海可有與緋聞男友龍先生見面？她說：「黐線，我今日上嚟捧場咋。」她又透露現正計劃搬細屋，她說：「我想搵一千呎左右，𠵱家賣晒啲古董、傢俬，少啲身外物。」
章小蕙又透露在十月尾電影《桃色》舉行的首映禮上，將會留位予以前的男友，她說：「邊個要嚟就會留位，差不多七星伴月啦。」問她是否「翻啅」陳曜旻？章小蕙即時話：「啋！𠵱家我有拖拍，不過未有畀獨家專利任何人，我要衝出亞洲多元化。」

黃伊汶帶病任嘉賓
而大會前晚就請來黃伊汶及內地藝人孫楠表演，帶病上陣的黃伊汶事前興奮地說：「我好緊張，因為今日係上流社會人士睇，我啱啱澳洲返嚟，三日食咗五十隻蠔，以蠔代飯。」但可惜一眾富豪及周星馳等在未開騷時，已從後門離開。