沙士後樓價火速攀升，原來三房或以上單位，普遍跑贏兩房成條街，美聯分析十個屋苑，發現全部三房單位呎價升幅高過兩房。
以幅度計，鰂魚涌康怡花園升六成六最勁，呎價四千三，兩房僅升五成二至三千八。太古城升六成一至每呎五千一，兩房漲五成八，呎價四千一。美聯首席分析師劉嘉輝話，係換樓潮推動。
不過，若用三房同兩房比較，荃灣愉景新城差距最大，三房升近兩成半，但兩房只得八點三巴仙，差天共地。劉嘉輝解釋，愉城新三房單位已經唔多，同區選擇又有限，換樓客可以揀嘅新樓，差唔多得番愉景新城。
不過，若果買黃埔花園就好啲，因為三房升三成七，兩房都升三成六。
商場競爭激烈，每逢節日，都要花盡心思，搞活動吸引消費者，重要次次唔同主題，送嘅禮品又要夠新意。
好似今日國慶黃金周開始，商場面對內地自由行客，提供優惠。新地大埔超級城、上水新都廣場、元朗廣場、尖沙嘴新太陽廣場及柴灣新翠商場，會派簡體版旅遊指南、折扣優惠，又搞國際名牌博覽，招徠內地客。
地鐵再辦購物優惠；而恒基將軍澳新都城中心商場，舉行「2004中港超級人氣模特兒大賽」。至於信和尖沙嘴中港城商場就舉行「泡茶樂」，展銷中外各地名茶。
另外，銅鑼灣時代廣場禮拜日有李雲迪鋼琴演奏，個琴鑲上九千粒水晶同二十四K金圖案，價值600萬元，只有三款限量版鋼琴展出。
商場除咗喺吸引顧客方面要貼身大比拼，宣傳都一樣好激烈，希望爭取更多見報率。
致生馮氏家族荃灣油柑頭馮積善別墅，噚日截標，呢幅市值逾兩億嘅海景豪宅地皮，吸引到新地與信和入標，市傳最近積極買地嘅恒地都有入標，不過未證實。
新地與信和大方承認有入標，據悉，業主一周內選定花落誰家。
招標地皮其實有兩幅，可以相連發展，合共七萬四呎，最少可以發展九萬八呎住宅，若以兩億元計，每呎樓面地價大約二千，補埋地價，最多可發展十五萬五呎，接近二百個八百呎單位。
祈福集團佛山祈福南灣半島，上個月底開賣，首日賣出四百幾套。據講，有個做生意嘅客，自己用四百五萬買咗四套，畀自己同仔女住，重搵埋同輩嘅兄弟姊妹一齊入市，結果呢個家族，夾埋買咗一幢洋房，共八套單位。
另當地設廠嘅港商，一口氣用五百三萬，買入六套單位，用嚟招呼海內外生意拍檔，顯示一吓自己嘅豪氣。
南灣半島今日國慶日再度開盤，晚上舉行煙花滙演。本月七日前買，有八五折。
蘭西
電郵地址：
