個個都上晒北京，結果搞到要律政司司長梁愛詩，噚日做咗一日「梁特首」。詩姐噚日用署理特首嘅身份參加工聯會國慶酒會，唔知係咪升咗級做特首，法律唔係佢首要任務，八方噚日問詩姐，「點睇長毛入稟告政府？」詩姐都唔回應。
工聯會國慶酒會每年都大把官員參加，但今年個個都上晒京，就連唔上京嘅嫻姐都唔嚟，結果得番工聯會理事長黃國健撐場，加多個「要還人情債畀工聯會」嘅民建聯陳鑑林。
另外，公民教育委員會噚日吹風，介紹今日開始播放嘅愛國教育宣傳片，但係個吹風會好奇怪，主席香灼璣死都唔肯畀記者睇套片，重話套片「俾新聞處用好多個夾萬鎖住」，搞到記者問咗一大輪，都唔係好知套片有乜嘢睇。
不過新聞處啲夾萬真係唔掂，有線電視噚日已經係咁不斷播條片出街。民政事務局同八方解釋話，佢哋一早畀咗啲片電視台做預備，只係有線唔聽話先播出街！有線聽到佢哋咁講，梗係媽媽聲。
（圖）國慶當前，做緊署理特首嘅梁愛詩一於少理長毛話要告政府單嘢。
傳真︰2623-9278
電郵︰