爆機狂迷：<br>《BioHazard4》變身動作Game踼喪屍

爆機狂迷：
《BioHazard4》變身動作Game踼喪屍

《BioHazard》之父三上真司一意孤行，為撐任天堂而將《BioHazard4》畀GameCube獨佔推出。為增聲勢，CAPCOM除喺東京遊戲展（TGS）內力谷外，重跟《Fami通》合作，推出附有《BioHazard4》體驗版嘅增刊號，一試市場反應，勢估唔到反應超乎想像，增刊號一出即斷市缺貨，搞到好多機迷埋怨買唔到。GC市場佔有率雖不及PS2，不過若歐美市場銷得，條數都好襟計，故此今集一反過往，將加入大量動作元素，目的就係討好歐美龐大嘅機迷市場。

記者、攝影：徐影龍
鳴謝：DreamStore
(c)CAPCOMCo.,LTD.2004ALLRIGHTSRESERVED.

遊戲類型：動作＋解謎
對應機種：GameCube
遊玩人數：1人
推出日期：2004年冬季
售價：未定　開發商：CAPCOM

喺TGS開Show第一日，CAPCOM就同日本Game書之王《Fami通》合作，推出《Fami通增刊號：CAPCOM》。全書最大賣點並非講齊CAPCOM嚟緊嘅勁Game，而係隨書附送《BioHazard4》體驗版！呢本書乃筆者採訪TGS後另一目標之物，點知頭尾加埋六日行程，都完全唔見呢本增刊號嘅蹤影，「㗎仔」Sales話一早賣晒，連TGS會場內都一日內迅速售清，筆者都係返到嚟香港，先搵到本增刊號為大家介紹！

■《Fami通增刊號：CAPCOM》附送一睇、一玩兩大光碟，日本迅速斷貨。1,490日圓

日光日白唔夠驚嚇
當初宣布《BioHazard4》，劇情以攻陷萬惡之首雨傘公司為骨幹，不過到最後《BioHazard》總旗手三上真司唔多滿意個故事，改頭換面成𠵱家呢個版本。試玩版劇情講述Leon自浣熊市事件6年後，成為特工，任務係深入村莊拯救總統個女。
遊戲以全3D形式表達，比前作《BioHazard0》嘅硬性視點有更高靈活性，雖然畫面質素未見驚喜，不過動作流暢度做得相當之好。由於身處大白天嘅郊外，除咗靜到死之外，完全冇過往嗰種陰沉壓迫感，試玩版上半段一味周山走，勁有《SilentHill》Feel，死硬派Fans可能唔多慣，不過已推出咁多續篇，改變一下始終係件好事。

■除試玩碟外，重有CAPCOM勁作晒冷DVD。

■特工Leon

動作要求提高
《BioHazard4》動作元素大大加強，舊有玩家需花時間摸熟新系統。首先係槍擊方面，唔再係自動Lock住敵人，舉槍後需調校角度，如射天上飛緊嘅烏鴉或地上爬嘅怪物，不過緊張時好易射失。
另外首度出現腳踢攻擊，當敵人攻擊一瞬間按A掣，會出現好型嘅飛踢，一下子吹飛敵人，被圍攻時尤其好用，意念明顯嚟自《鬼武者》嘅一閃攻擊。去到試玩版後段嘅村莊，主角需周圍搵補給道具，擒上擒落兼爬梯，今集就特別多跳飛動作，去到指定地方如屋頂、圍欄邊會出現提示，按A掣就會有相應動作，辛苦爬到好高，一躍就可跳返落嚟，相當之方便。可以預見，《BioHazard4》為照顧歐美機迷，已完完全全變成一款動作Game，反應靈活重要過食腦。

■中段遇到一隻跌入陷阱嘅狼，救唔救對劇情都冇影響。

■呢班暴民AI極高，識圍攻、吹雞兼飛斧頭，難搞過真喪屍。

■按體積決定物件攜帶量，打橫打直任你擺，似足《俄羅斯方塊》。

■被攻擊一剎按A掣，可進行腳踢反擊。

試玩版爆機攻略
試玩版難度唔高，初段小貓三兩隻供你熟習Leon動作之用，後段去到村莊會遇到大批瘋狂村民，一定時間後就會強制性結束。而第一次爆機後，會出現HardMode、Movie等模式，而且重提示玩家超過30,000分嘅話，會有「額外獎賞」。
一般玩法大多只得幾千分，要過30,000之數，必須大量獵殺暴民，最佳辦法係盡量節省彈藥，以應付後段無窮無盡嘅暴民，適時運用手榴彈，以最少時間獵殺最多敵人，口訣係「前慳、後快」。辛苦一輪衝破30,000分，會獎你機關槍一把，讓你殺得更痛快，可惜無得Save，關機後一切要重新開始。

■新加望遠鏡模式，可看清遠處敵人動靜。

■遇着欄杆、高台會出現指示，可蹤身一躍而過。

■總統之女Ashley

■新嘅敵人電鋸男，俾佢劈中一嘢即時GameOver。

■迅速兼大量獵殺敵人，較易獲取高分。

■散彈槍同手榴彈，都係有效武器，應盡量搜集。