飛天朱喺烏魯木齊玩滑翔傘闖大禍，跌咗落架車頂，差啲命仔都冇埋，噚日八方喺機場貴賓室門口，見佢縛住隻右手都要上京參加國慶活動，真係為佢辛苦。
點知佢身邊嘅人話，飛天朱唔知幾雀躍，佢話國慶咁開心，一定要去喎。老朱愛玩愛熱鬧嘅死性不改，冇人有佢符。聽講佢喺上海接受接駁手術後，𠵱家重要做物理治療，即係未好晒。
有得見胡溫，又唔怪得咁多人搶住去，八方心水清，發現好多冇再選立法會或者係落選人馬都有得上京，好似譚偉豪、馬逢國、劉漢銓、楊耀忠、朱幼麟、張華峰等等，當然佢哋都係界別表表者，或者係人大政協，有身份之人。
另外，胡錦濤上場，總有啲新姿態，《財富》噚日就宣布明年五月十六至十八日喺北京舉行嘅全球論壇已經定咗喺北京舉行，重請到胡主席致開幕詞。
（圖）朱幼麟紮住隻手都話要上北京湊熱鬧，真係夠晒神心。
傳真︰2623-9278
電郵︰