北角邨空地暫時未有用途，兼且政府想托高地價，控制土地供應，呢塊貴重地皮好耐都唔會推出市場，房委會已經廢咗武功，好難有話事權咯。
既然如此，北角邨空地用嚟做乜？藝術發展局諗得周到，用年租一蚊嘅價錢，向政府租用一年，再交畀藝術團體使用。藝發局預備用一百萬元搭竹棚，再撥兩百萬津貼啲藝術團體，不過應該未夠用嘅，藝術團體要向商界搵贊助費。
據講，北角邨搭嘅戲棚，係V字型設計，演藝團體將來設計舞台布置，要好有創意至得。點解唔四四正正，搭個盂蘭勝會式舞台呢？因為北角邨內有好多數十年歷史嘅大樹，政府不准斬樹，一棵也不能少，所以搭棚有難度，一定要將就樹木坐向。
你話政府唔着重環保，好多時都啱，但對某些地區某些樹，政府就極度重視，金鐘太古廣場、長江中心外嘅大樹，地產商就用咗幾百萬元來精心保護、照顧。一位體壇前輩，南華會資深會員對左丁山講：「南華會擴建計劃，因為有一棵大樹唔准郁，搞唔掂，已經用咗過千萬元嘅工程，暫時停晒。」
既然政府咁重視大樹老樹，呢位前輩話：「中區警署古蹟群，政府想招標發展，現因何東家族提出保護計劃，招標會延遲，遲咪遲囉，橫掂古蹟已有百幾年歷史，內有唔少百年古樹啩，都唔爭在擺多一兩年啦。如果政府要發展嘅話，你哋可以要求政府依照先例，保護古蹟群內，圍牆內每一棵樹，一棵也不能斬！有此條件限制，任何中標發展商都會頭痛，加重發展成本，令政府三思，不如交畀有心人去保護更好！」