國慶假期前夕，港股急升169點，收13120，成交達154.29億元。阿虎放中秋假期間見到滙控（005）土耳其分行受到炸彈襲擊，擔心滙控會拖累港股表現，但滙控不受影響，升1元，收124元。至於宣布出售和記電訊國際（2332）股權套現75-87億元的和黃（013），在李超人增持的消息刺激下造好，升1.24%至61元。黑客話，噚日係第3季季結，芬老點都要做靚盤數，結算過後，就比較難講。
國企指數勁升2.33%賀國慶，不過香港政府揀正國慶日減綜援就認真唔識做，唔知算唔算政治不正確呢？原材料股升幅驚人，中鋁（2600）1個月內兩度調高氧化鋁價至每噸4130元人民幣，刺激股價勁升7.44%，收5.05元；江銅（358）升7.65%；馬鋼（323）及鞍鋼（347）分別升4.55%及5%。
中國電力國際下周正式招股，電力股齊來助興，華電國際（1071）升4%至2.55元；華能（902）升1.6%至6.30元；大唐發電（991）升2.4%至6.35元。
一直被美林看好的中意控股（1198）噚日突然停牌，話有股價敏感消息公布，停牌前報4.80元。最近頻頻有消息話公司董事斥巨資收購豪宅，唔知同呢件事有冇關係？現時豪宅價格動輒億億聲，而中意控股市值只得11.70億元。
阿虎噚日提到九巴（062）董事長陳祖澤喊晒救命，話油價每升1美元，九巴「每日」要畀多100萬元。九巴公關反應好快，噚日下晝即電傳老編，話唔係「每日」，而係「每月」畀多100萬元至啱。阿虎記得嗰日睇電視，陳董明明係話「每日」，上網搜尋當日新聞，亦係如是說。聽老編講，原來當日有人口快講錯嘢，九巴其後電傳傳媒澄清，只係阿虎收唔切風啫。冇法啦，惟有喺度同佢再澄清一次。
阿虎