由特首率領嘅國慶觀禮團認真騎呢，八方實在跌晒眼鏡，因為唔只有問責官員冇咗影，派晒啲常秘去充撐場面，連啲有錢佬都冇面畀，李家只得個小小超，郭家冇人，李兆基、鄭裕彤都冇，唔知搞乜鬼，反而許仕仁就有份，唔知代表邊一瓣。
眾主要官員之中，最奇怪係廉署有專員黃鴻超、審計署有署長鄧國斌、入境事務處有處長黎棟國、海關有關長湯顯明，偏偏就唔見咗警務處處長李明逵（圖）。
八方問警隊，佢哋開頭都話唔知情，好似話一哥公幹不在港，後嚟就正式回應，只得一句話，就係「警務處沒有代表參加訪京團。」
警隊冇代表？八方再周圍搵警隊發言人吳耀文，佢老哥原來人在北京，參加清華大學一個為期兩周嘅中國國情研習班，佢梗係冇料啦。佢話佢哋有二十八位高官嚟咗，團長係九龍城指揮官范錫明，今日就結業，前晚去咗大會堂出席僑辦嘅國慶酒會，喺北京過中秋，大家都好思鄉喎。
傳真︰2623-9278
電郵︰