錢雖然唔係萬能，但有錢就真係威過人！好似車路士咁，呢排威到盡。
前晚歐冠盃，車仔就憑住億萬大軍嘅強大兵力，喺主場清風送爽咁輕取衞冕嘅波圖三比一；本來我求大俠見到車仔入波後，佢哋位倒戈領隊摩連奴，完全不念舊情咁喺班舊袍澤面前又跳又笑，印象分又一減；但原來呢場波佢坐嘅後備廂喺正客軍波圖球迷前面，重曾經俾人吐口水，難怪佢咁得戚啦。
同晚同組賽事，莫斯科中央陸軍亦都贏波，同樣係中央陸軍老細嘅阿巴莫域治，都算雙喜臨門；咁重未算，「車仔」已發聲明宣布，季尾唔會再同目前心口贊助商「阿聯酋航空」續新約，原因係嫌人哋唔夠普及化喎！咁又係嘅，阿巴莫域治咁叠水，使乜贊助吖！
前晚歐冠盃巴塞以三比○贏薩克達，繼續帶挈捧場客贏錢。其實巴塞喺呢場波重有好多入波機會，若非對方門將有超水準演出，「主其他」都有得開。但巴塞教頭列卡特賽後就話，應該可贏到五比二！做乜送兩球畀人打擊己隊後防士氣呢？唔通佢買咗「總入球」七球或以上呢瓣？
入屋叫人入廟拜神，羅馬新教練迪尼利上任後，即表示會以隊中大哥托迪為中心建立球隊，都算識講嘢。又係嘅，呢位前基爾禾教頭喺暑假獲歐冠盃冠軍波圖垂青，點知未開季已被炒，𠵱家反而教到國內大會羅馬，直情要還神！但係羅馬重有件小霸王卡斯辛奴，因住顧此失彼喎！
美國傳媒早前爆出拜恩性侵犯案嘅口供內容，其中一部份講到隊友奧尼爾都惹咗唔少風流債，但每次都用錢搞掂，到𠵱家起碼使咗一百萬美金。奧尼爾知道後㷫過辣雞，反駁話自己從來唔使用錢買愛，只有拜恩先咁cheap。真係估唔到「孖寶」東、西分隔後，重要隔岸互轟！
溜馬前鋒阿達斯為咗向偶像洛文致敬，今季將球衣號數由二十三號改做九十一號，我求大俠希望佢學到洛文喺球場上好嘅一面，千祈唔好學埋「壞孩子」到處惹事生非嘅喪嘢。講開洛文，據聞佢即將同一支墨西哥球隊簽一份短約，打幾場波作為重返NBA嘅熱身，祝佢成功喇！