王伯昭前日向張衞健同謝霆鋒下最後通牒，要兩人喺前晚十點前畀一個令佢同身邊朋友都滿意嘅道歉聲明，否則佢會循刑事起訴佢哋「故意傷人」同「造成他人輕傷」，噚日佢又話到𠵱家為止都未起訴，不過就會保留呢個權利，但同時又要人哋再道歉，真係乜都係佢講晒啦。
霆鋒經理人Mani就話霆鋒要做嘅嘢已經做晒，佢亦都好有誠意，其他嘢就交番畀公司為佢處理。
至於王伯昭噚日喺電話讀出佢最新版本：「我不能接受張衞健、謝霆鋒有關打傷我的書面道歉，在事情已經很清楚的情況下，仍然試圖用『假設』、『誤傷』來掩飾事情的真相，沒有道歉的誠意，我不接受。
「在當面道歉的那天，我曾指出書面聲明不行，他們承諾會回去修改，但修改至今沒有下文，我已表現出極大的耐心和寬容，只希望對方在尊重事實的基礎上，道歉並承擔責任。事到如今，我需要給所有關心我、幫助我、聲援我的同行和公眾一個事情的真相，事實不清則是非不明，如果張、謝兩個沒有勇氣做出尊重事實的道歉並承擔責任，我將訴諸法律追究他們的侵權（侵犯人權）責任。」
王伯昭日日發聲明，人哋同佢道咗歉又話唔滿意，重搞到話可能刑事起訴，之前做和事老嘅徐小明話覺得兩個後生仔已經做足誠意，但𠵱家件事日日有新版本，所以暫時都唔回應住。
吳日言噚日喺新城接受訪問，佢自爆話同佢分咗手年幾嘅男朋友喺中秋節約佢見面，但因為有工作在身，所以冇應約，不過吳日言話雖然大家已經分咗手，但間中都有聯絡，而佢前晚返到屋企至發現原來爸爸都係一個人留喺屋企過中秋，冇人陪。
孫燕姿下月底會推出新唱片，佢遲啲會去法國拍攝MV，新碟預計收錄十二首歌，然後從中挑選十首歌拍MV。華納唱片高層陳澤杉話孫燕姿新唱片嘅母帶𠵱家鎖咗喺保險箱裏邊，其他宣傳嘅細節暫時都要保密，唔可以咁快向外公布住。
繆非臨前晚去咗數碼港睇電影《2046》首映，非非嗰晚打扮到好靚咁出現，謀殺記者不少菲林。問到非非嘅近況，佢話：「呢排忙緊處理生意，同埋嚟緊會幫一位好友做伴娘，都好忙吓。」不過非非就話緣份天注定，唔心急搵男朋友喎。
一份韓國報章噚日報道，韓國女星全智賢想同佢所屬事務所嘅三十七歲鄭社長喺十一月結婚。報道指由於男方工作繁忙，暫時婚期未定，但據全智賢身邊朋友透露，全智賢好希望可以喺十一月結婚。據知全智賢讀中學時已經認識鄭社長，並由佢一手帶入行。
六位準亞姐噚日到港台接受車淑梅訪問，佢哋重各自帶備咗中秋節食品送畀聽眾，並由聽眾選出最有心思嘅佳麗，結果由1號黃淑玲勝出，佢之後更即場接受車淑梅加冕，率先嘗獲勝滋味。
鄭融同劉浩龍前晚日出席喺奧海城舉行嘅活動，鄭融日前參加新一輯嘅無綫遊戲節目《繼續無敵獎門人》，由於佢玩得太投入，卒之搞到損手爛腳，但佢仍樂此不疲，鄭融話：「呢個節目好好玩，又有禮物，玩多幾次都唔怕。雖然有啲禮物都唔係好啱自己用，但可以扮闊佬派畀朋友。」
