單幢樓，過去一直都難賣兼唔可以賣得高價，呢個定律𠵱家要改寫嘞！由九龍城大地主──國際集團發展嘅博林軒，全幢48伙，半個月內已經沽清；其中連天台嘅單位，重係以97年後同區新高呎價賣出。
代理中原地產助理董事王鎮維話，呢個頂層連天台單位，面積590呎，另天台250呎，成交價338萬，呎價5729蚊。至於最後一個連平台單位，594呎，平台400呎，以290.8萬售出，都要4896蚊一呎。
家陣博林軒重有5個二手放盤，主要係750呎嘅3房A單位，叫價比購入價高一成半，呎價4100至4600。
香港人買樓，有時同行開街順便買件衫差唔多。
中原高級分區經理鍾耀強表示，一對姊妹花，中秋節陪阿爸阿媽飲茶，跟住一齊去睇樓，睇完荃灣麗城花園二期四座中層E單位，阿爸阿媽覺得間隔四正，都幾鍾意。兩姊妹二話不說，即刻拍板用173.8萬，買畀父母換樓，當做中秋禮物，認真孝順！
中國奧運健將揚威返國，即刻被各商業機構招攬協助宣傳，繼早前和黃番禺珊瑚灣畔請嚟多位奧運健兒幫手宣傳後；深圳大梅沙嘅「心海．伽藍」，都請咗彭勃、吳敏霞、勞麗詩等奧運健將參觀，呢個消息重吸引唔少業主，同大批市民走圍觀，當然唔少得攞簽名。
樓盤推出嘅首批百二套單位，平均呎價880，經已沽清，套現億三。
發展商深圳市心海投資計劃喺十一國慶，推出30套袖珍型全複式海景單位；睇番資料，樓盤最細都有802呎。
上市承建商俊和集團，早年投得地鐵彩虹站住宅項目，原來已經改名，叫清水灣道8號；噚日經紀開始收票，每張8萬，10月內購。
東九龍都一段時間冇新樓，呢個盤應該有一定捧場客，代理估計售價參考牛池灣曉暉花園，每呎3300起，高層海景更超過5000。
個盤等緊售樓紙，預計明年底入伙；總共316個單位，由600幾至1800幾，全部有露台，特色雙連戶和複式單位當然唔缺少。
經紀重話今日有得睇示範單位，就設喺九龍灣其士商業中心。
香港樓價重回上升軌，唔單止本地人積極入市，利嘉閣分行經理張向榮話，近嚟多咗外國投資者越洋入市，一個已移居美國嘅港人，託朋友幫佢喺香港搵樓，前後兩個禮拜，就以市價360萬，購入紅磡半島豪庭二座中層H室，面積931呎，呎價3867蚊。呢類單位全包月租可達萬七蚊，回報近五厘七。
由於大市向好，半島豪庭近兩個月成交倍增，唔少係投資客，就算業主輕微反價3至5個巴仙，都一樣照追價入市。張向榮話，半島豪庭今個月至今已有16宗買賣，平均呎價約4400蚊。
蘭西
電郵地址：
