今年中秋與國慶假期接近，國內唔少人都會放長假外遊，香港當然會受惠於自由行，不過零售股中秋假期前冇乜表現，只得卓悅（653）較為醒神，單日升5.8%至3.175元。不過黃金周之後，零售股多數會公布呢個檔期的銷售成績，估計會為零售股帶來唔少好消息，由於國內唔少女士都鍾意來港掃化妝品，所以莎莎（178）及卓悅的銷情值得留意。
不過黑客話，由於最近證監會睇孖展睇得好緊，炒家唔容易取得融資，零售股後市有冇得炒，還要看芬佬實力。此後，最近油價升到破晒位，大行都要研究一下對香港影響有多大，需否將港股投資評級調低，若果大行看淡港股前景，相信零售股都一樣冇運行。
內地汽車股受到油價高企及汽車信貸雙重打擊，駿威（203）周二股價大跌3.2%，收2.575元；華晨（1114）跌1.29%，收1.53元；而慶鈴（1122）則冇起跌，平收1.04元。
油價升破50美元，九巴（062）董事長陳祖澤喺傳媒面前喊晒救命，話唔知點算好，重話油價每升1美元，九巴每日要畀多100萬元，唔知係阿虎聽錯，定係佢講錯，一年有365日，即油價每升１美元，九巴1年要畀多3.65億元，足可將九巴中期盈利清袋。如果陳生所言非虛，九巴應發出盈利警告，但九巴周二仍升0.54%，收37.10元，其他受油價急升影響的國泰（293）跌1.5%，東航（670）跌0.63%，南航（1055）跌1.78%。
阿虎