好多叻人唔肯從政，只願做私人生意或者低調打工，各有原因，最重要嘅一條就係唔想私生活暴露於水銀燈下，俾啲傳媒揭露，甚至俾狗仔隊跟蹤。美國、英國嘅案例見得多，唔少名人一旦宣布競選議員或者公共職位，私隱就冇晒；或者一旦被政府委任做重要公職，情況亦一樣，譬如美國最高法院法官ClarenceThomas被提名做法官之時，前女助手就出嚟指控，十幾年前曾經俾佢性騷擾，搞到湯瑪士一身蟻。
香港學人玩民主，自不然學埋呢一套，唔抵得渴之人，就唔好食鹹魚。最近盛傳有人（下稱此君）可能會當高官，此人平時冇乜公眾會識佢，左丁山亦唔知佢係邊個。但消息一傳開去，古仔就湧現，好多佢嘅同行話畀左丁山聽：「喂，此君有情人㗎，幾公開㖭，我哋人人都知。」唓，有情人，好巴閉咩，單身男人點解唔可以有情人？點知K醫生㗎㗎笑：「好耐以前就係單身男人，佢有情人就係搞婚外情！」
行街碰到此君嘅相識，新貴C。問佢對此君有乜評論，新貴C衝口而出：「我識佢嘅情人，係M機構嘅高層吖嘛，係人都知啦，乜你唔知咩？」真弊，以前都好多人知，冇人講，現在此君名字一旦曝光，立即傳聞滿天飛，欲享齊人之福都係保持低調，避免見報好過，一見光，私隱就無所遁形，唯一應付嘅方法，就係向何厚鏵先生學習：「男人好難話冇嘅，我已向太太交代晒，以後唔會搞。」不過講得出呢句之前，要搞掂老婆未必咁容易㗎！高比拜恩涉及科羅拉多強姦案之後，立即送老婆一粒大鑽石，價值四百萬美元，你估請老婆去食碗「大婆牛肉麵」，老婆就肯下氣咩。