大市近排受油價高企衝擊，搞到腳仔軟軟，但十一黃金周明日開始，零售股照計應受惠。
經紀黃話，其實部份零售股早在上個星期已見異動，好似莎莎國際（178）等已經偷步炒上，至於擁有銅鑼灣黃金地段的利福國際（1212）亦同樣企硬，就算噚日係中秋補假，佢哋都廣邀證券界人士同埋一眾傳媒，遠赴上海參觀久光百貨，人哋搞到咁大陣仗，斷估利福股價唔會失威。
利福近排曾升穿過12元，周二股價就隨大市回落2.08%，收11.75元，只係大漲小回。
經紀黃又話，利福除咗帶人到上海外，其實亦頻頻約見分析員，陸續見到唔少外資證券行幫公司出報告，當中唔少都給予買入的評價。另外，早排被大股東減持的YGM貿易（375），其實亦有零售概念。經紀黃話，市場不時傳出YGM可能配股集資，但如果在短期內進行，大股東又冇乜理由喺呢個時候在市場上減持。
YGM於周二股價回落3.1%，收9.40元，成交股數有100萬股，金額948萬元。
慕容小初