周二晚美股反彈，周三本港冇市，其他亞太區市場普遍榮多於辱，最叻係澳洲，又見新高。全球睇住油價，昨日有啲多好消息。沙地阿拉伯提高產油量後，東京油價（明年2月到期期油）回落，周二收每公升26830日圓，周三最高都係呢個價，埋單26720日圓，跌110日圓（跌幅0.41%），折合桶價38.26美元。
歐洲周三開市初段，英法德股市都幾好吓。短期內，各主要股市走向，油價話晒事。相反理論派嘅睇法係，油價創新高，人人面青，專家又繼續向上望之時，可能就係油價見頂之日。為睇好油價而做嘢，水位可能有限。為睇淡油價而做嘢，當然唔會全無風險，油價挾多三兩美元，咁就弊傢伙，但有力捱落去嘅話，贏面可能較大。
恒指C輪：恒指過去兩個交易日最低見12908與12884，同9月10日最低12865相差非常有限，9RSI亦已落到40，消除晒早前嘅超買，如果油價見頂回落，港股彈番上幾百點唔係冇機會。若然出現咁嘅情況，早前所提嘅恒指C輪9911則會好好睇睇。9911由上周二頂部起計，5日內由22.1仙散到15.4仙，跌幅超過3成。博大市回升買恒指C輪，佢係主角，年底到期，溢價2.4%，槓桿率19.6倍（有效12倍），引伸波幅19%。
滙控C輪：滙控（005）成支定海神針，業績撐股價，睇長遠少少，食埋聖誕鐘、炒滙豐個浪，揸明年到期嘅C輪4441。隻輪明年6月到期，輪價43仙，溢價4.2%，槓桿率28.6倍（有效12.3倍），引伸波幅得14%。
章盛