精明消費：郊遊野餐唔少得<br>手提Hi-Fi愈出愈靚精明消費：郊遊野餐唔少得
手提Hi-Fi愈出愈靚
今時今日雖然MP3播放機、手機橫行，但秋高氣爽去郊外BBQ，細細部又可畀一大班朋友一齊聽歌的手提Hi-Fi，絕對是不可缺少的玩樂拍檔。所以不少廠商亦趁呢個時候推出新機，不論係兼容CD、錄音帶機種，定係淨播CD或只播錄音帶型號，都大玩防水、卡通人物，甚至播埋VCD、MP3功能，絕對係一個流動娛樂中心。
記者：張穎麟
攝影：楊錦文、陳智良
Model：Kiddy
淨播CD慳位玩款
淨播CD同收音機的手提Hi-Fi，雖然欠缺播錄音帶功能，但就勝在因為機身慳位，所以設計可以放膽一點。手袋形、米奇老鼠形之餘，更可加埋防水功能，款式極之吸引。
看看耳朵般的喇叭，以及由紅、黃二色組成的機身，就認得出呢部米奇老鼠手提Hi-Fi。雖然只可聽CD同收音機，但音色尚算不俗，最正係按鈕都設計成米奇一樣，Fans必定鍾意。
唔少手提Hi-Fi都係適合男孩子攜帶，女孩子想帶部機到郊外玩，呢部剛到埗的愛華CSD-P1就必定啱用。手袋形的設計，帶出街夠晒搶眼，又可對應CD-R/RW，夠方便。
雖則話帶手提Hi-Fi去海灘，但要說真正落水，相信就只有呢部innotec5240。佢特設防水扣，機身又可浮在水上，而且備有防震功能，堪稱全天候。
兼容CD、錄音帶功能最齊
由於CD盤的成本愈來愈低，唔少手提Hi-Fi除了收音機同錄音帶外，CD盤亦成為基本裝備。既有LittleTwinStars、太空船等得意外形，亦有兼容CD-R/RW、VCD、MP3等不同格式為賣點，內外兼備。
手提Hi-Fi中的收音機調頻，不是棒形，便是數位顯示，悶得發慌。難得呢部WintechKH838用上汽車咪表式的調頻器，再襯埋橙色機身的確帶點新意。
無論拎出街定放在床頭都啱用的BodysonicBP×-200CDA手提Hi-Fi，有齊時鐘同鬧鐘功能，值得一提係收音機可接駁天線，在室內收得更清，兼容CD-R/RW。
白×粉紅加埋LittleTwinsStars的Kiki同Lala公仔，外形夠晒吸引。可聽齊CD、錄音帶同收音機，CD更擁有19個Programme播放，比唔少同類機種更優勝。
呢部AkaiAJC5200R的隱藏式按鈕設計卻值得一讚。大大粒的錄音帶「Play、Stop」等按鈕，由面蓋冚住，有效制止常常出現的誤按情況，再加埋無線遙控更好用。
愛華CSD-EL201唔單止可以播CD-R/RW兼容性夠大，而且擁有2吋LCD顯示清楚。備有響鬧功能，機頂有大大粒的Snooze掣，一按就可關掉響鬧，同鬧鐘一樣方便。
呢部SONYCFDV8可能令你以為佢只着力於MegaBass的表現，但當你試機後會發現佢特別靚聲，人聲方面扭大都唔拆，比一般手提Hi-Fi優勝，拍住家用Hi-Fi組合都唔輸蝕。
無論你喜歡聽搖滾樂、流行曲定爵士樂，適合的分音設定，才可將靚聲演繹出來。因此愛華的CSD-A100就設有「Rock、Pop、Jazz」三種電腦分音，一按就獲得適當分音，夠晒方便。
話明手提Hi-Fi當然係去到邊用到邊，飛利浦的AZ1004除了可用乾電池外，更可接受110V-240V的世界電壓，就算去到美加等地亦可以接駁插蘇聽靚歌。
電單車頭盔一樣的雅佳AJ-C3105手提Hi-Fi，襯上一身銀色造型，唔單止外形搶眼，又可預設歌曲Programme。輸出方面，竟然擁有60WP.M.P.O.，夠晒力水，身形與實力不成正比。
臨睡前聽聽歌令人容易入睡，所以呢部愛華CSD-A300特設夜光LCD，讓你在黑暗中都可清楚睇到曲目。音色方面T-Bass的表現尚算沉厚，低音表現不俗。
想找最平的手提Hi-Fi，呢部Jyoto的KDD-590絕對係不二之選，$200唔使就可玩齊收音機、CD同錄音帶，重有埋CD重播同Programme設定，比冇喇叭的Discman更抵。
要找一部兼容度最高的手提Hi-Fi，飛利浦的A25130屬首選。VCD、MP3、CD，再加埋錄音帶同收音機，乜都播齊。又可以將畫面同聲音輸出，加埋無線遙控，只需接駁電視便變身成家庭影院。
主攻錄音帶
錄音捲帶更厲害
只兼容錄音帶同收音機的手提Hi-Fi，論音色功能雖然都唔可以同另外兩大類雙提並論。但勝在抵玩之餘，專心主攻內置咪高峯錄音、高速捲帶、EQ分音等功能，效果絕不下於兼容機種。
雖然呢部愛華RMP-306機仔細細，更只得單聲道喇叭，但一樣有齊收音機同錄音帶播放，功能尚算齊備。最厲害係機頂設有咪高峯，唔使另外接駁都可進行錄音，夠方便。
方便你將錄音帶音樂翻錄，以作保存的雙卡式設計，今時今日已愈來愈罕見，難得呢部三洋M-×W360DF仍有此功能，更擁有超高速倒帶功能，比一般卡式機快一倍有多。
今時今日聽收音機的人，可能比錄音帶更多，因此呢部專攻收音機同錄音帶的愛華CS-P506，便在收音機靈敏度內下一番苦功，就算只用機頂天線，亦可以獲得不俗的接收效果。
售賣點
(a)JCShop 31022783 銅鑼灣時代廣場833舖
(b)最好電器 29400163 荃灣愉景新城購物中心3樓1號舖
(c)吉之島 28846888 鰂魚涌康山道2號康怡廣場南
(d)華仁會 23980280 旺角花園街75-77號花園商業大廈5樓
其實唔少手提Hi-Fi在倒捲錄音帶時，就算倒盡也不會自動停低，因而浪費電力。之不過呢部雅佳AJ-S4250，雖然只得單聲道喇叭，但卻懂得在倒帶後自動關上，既錫機又環保。
呢部雅佳AJ-D4450可說是全能的雙卡式機種，雙卡式錄音、自動關機、3段分音調校、內置米高峯、AM/FM收音機，再加埋80WP.M.P.O.，可說是一切功能應有盡有。