兄弟波，有幫拖？呢期球圈颳起一陣阿哥帶挈細佬風氣，巴塞隆拿嗰邊個伊圖打出對辦波之後，馬略卡即刻簽入佢細佬大衞伊圖，唔理踢唔踢得都希望叨大佬光沾吓其財氣，博轉吓手又賣到好價；呢邊風頭更勁嘅朗尼，亦帶挈埋十三歲嘅細佬約翰朗尼，齊齊加盟曼聯。
據報道約翰朗尼已剛成為曼聯青年軍，球會對佢評價甚高，重叫大家唔好奇怪將來曼聯由朗尼兄弟帶領之下稱霸球圈。
大佬前晚首替曼聯上陣，即喺歐冠盃省入三粒，又真係幾犀利；若然細佬真係唔差得過大佬嘅，「朗尼」呢兩個字，真係好有可能成為未來二十年球圈標記之一。
布力般終以一紙條件最優厚嘅短期合約（至一月屆滿），爭贏富咸及樸茨茅夫等對手，簽入前法國國腳佐卡夫。換個角度睇，佐卡夫真係好識得利用自由身不受轉會期限制條例，放完個長暑假返嚟，仍然可以喺呢個轉會期已過嘅時間，再慢慢揀到啱至落班，亦都高招！
利物浦前晚作客輸畀奧林比亞高斯，英格蘭球會作客希臘球會三十二年不敗紀錄終於打破；「紅軍」領隊賓尼迪斯賽後亦鬼殺咁嘈，狠批隊波踢得差！睇番數據，又真係差得離譜，全場九十分鐘利物浦只射過四次門，重要冇一次中目標，抵輸啦。真係「想要生活好，咪掂利物浦」。
曼聯、皇馬、拜仁等強隊前日都主場大勝，惟獨祖雲達斯靠矮仔甘莫蘭尼斯頂入，以一比○小勝以色列球隊特拉維夫馬卡比，上盤客肯定失望至極。呢場波唔止入波少，衰到唔夠七千人入場睇，雖則話安全理由影響入座人數，但咁情況又確係離譜，祖軍高層要諗諗計啦。
曼聯日前證實，佢哋計劃喺下年七月去亞洲兩個國家日本同埋中國進行季前集訓。曼聯對上兩季都係去美國集訓，目的係開拓當地市場，但賺嘅錢唔多；而佢哋之前公布上季業績，跌咗成千萬鎊，所以佢哋如果真係去有百萬Fans嘅亞洲，目的顯而易見，知唔係搵錢囉！