亞洲時段，油價升上50美元以上，港股再跌，市場焦點喺油股身上，油股隻隻升。如果認為油價會繼續上，買油股C輪當然係搵銀之道。不過油價未必能長期高企，油股C輪追唔追得過，要諗過先。幾年前，當油價跌到10美元之時，有啲英國專家話睇會跌到5美元，結果當然睇錯。油價𠵱家「5張嘢」，又有大名氣大行睇「6張嘢」，你信唔信？
中石油C輪：中石油C輪正路之選係9851，輪價43仙，溢價0.2%，槓桿率9.5倍（有效9倍），引伸波幅20%，壽命唔太長，11月中夠鐘。唔想太搏殺，想風險細啲，則揀9343，輪價92仙，0溢價，槓桿率4.5倍（有效亦係），引伸波幅22%，壽命長過9851一個月。兩隻輪升幅冇追貼正股（857），有啲味道係正股再升可能會有壓力。
中海油C輪：中海油C輪正路之選係9870，壽命有限，10月26日最後買賣，輪價53仙，溢價0.1%，槓桿率7.6倍（有效7.4倍），引伸波幅25%。另1隻9144，明年2月到期，數據都算唔錯，弊在交投一片空白。油股之中，中海油正股冇其他兩件咁吸引，炒中海油C輪要計埋呢個因素。
中石化C輪：中石化C輪正路之選係9842，年底到期，輪價28仙，溢價5%，槓桿率11.2倍（有效7.1倍），引伸波幅34%。其次2240，好長壽，明年4月到期，輪價46仙，溢價6.9%，槓桿率6.8倍（有效4.6倍），引伸波幅35%。講數據，中石化C輪冇中石油及中海油C輪咁靚。
章盛