董團夥拉大隊赴京搶包山，今日正式吹雞，有傳阿胡親自單獨照肺，中方透過傳媒透露，中央會要求阿董「提高管治水平」。
咦，乜阿董啲「管治水平」好劣質咩？唔好講七年來土共左報日讚夜捧，睇吓中央首長點講──二○○一年財富論壇開幕宴，國家主席江澤民話：「以董建華為行政長官的特別行政區政府有智慧、有能力駕馭複雜局勢」。二○○三年三月，溫寶賜見阿董，亦大讚「董先生做得很好」。至於黑面朱，亦喺二○○○年訪問南韓時大讚「滿意，他阿董比我的工作做得好。」既然係咁，我哋阿董之「執政能力」梗係一百零一分。突然間現在話要「提高」，嘩，咁咪即是原來江溫朱等領導人全部係大話精？
正如保證香港五十年不變一樣，國家領導人說話是算數的，睜眼說謊，又點有可能呢係咪？所以選舉期間，啲保皇黨爭住踩董、唾董、棄董，話跟佢搵食，只有辱，沒有榮，又誣衊佢「先天不足，後天失調」。同一小撮反董名嘴如毓民及五十萬人大遊行一個鼻哥窿出氣，即是曲線反江、倒溫、辱朱，用心極為陰險，共產黨嘅敵人，就在內部，呢句說話，列寧真係冇講錯。
所以今次董團夥上京接受訓話，大家唔使驚，並唔係面斥阿董，反為係阿胡自己要「提高執政能力」，係向「有智慧」兼做得好過朱鎔基嘅阿董低聲下氣求教佢點樣做總書記，想阿董過番幾戙佢學吓嘢㖭。
所以當前日阿董出席福建社團國慶酒會，竟然不幸額頭中手拉炮，爆缸掛彩，呢件事就好騎呢。福建社團係老左嘅中堅勢力，亦係蔡素玉所控制嘅地頭，點解不遲不早，喺正呢個時候，用手拉炮向阿董下毒手？擺明就係趁胡溫新人上台，揣摸上意，認為胡溫極之唔妥阿董，所以擅自代中央執行國法，等阿董包住個頭上京，博胡溫一笑咁解。若然係咁，八方可以負責任地講，佢哋就估錯晒嘞。我哋阿董佢任勞任怨，七年來展示咗優質嘅管治能力，好似史美倫幫國家玩股市咁，今次上京可以同胡溫新中央做國師，直頭係香港人的光榮呀。但願人長久，千里搵窿捐？係花好月圓就真！
傳真︰2623-9278
電郵︰