油價持續上升，令到股市冇啖好食，今日係中秋節翌日假期，港股休市正好畀大家冷靜一下，諗下後市投資策略。
經紀黃覺得，家陣應該炒股唔炒市，部份優質股可趁低吸納揸長線，將來收穫會更大，其中日前公布業績盈利倒退的泰興光學（389），原來係佢心水之一。
泰興上周五公布截至今年6月底止中期業績，盈利比起舊年同期下跌27.6%，只有6019.3萬元，消息曾經令泰興股價在周一急跌。
經紀黃話，分析員與泰興高層會面，了解實際情況後，明白盈利倒退主要係期內未能成功收購美國眼鏡零售商，錄得一次過開支500萬美元所致，實質上公司核心業務並無任何變化，故此泰興股價噚日止跌回升，收4.30元，升1.18%。
佢重話，泰興股價已經積弱一段時間，但其間並未為芬佬離棄，反而密密增持，既然佢哋早排喺較高位都一路吸納，所以現價更為吸引，可以買番多少慢慢坐。
另一方面，芬佬有啲擔心，怕泰興上次收購不成功，下次可能出高價收購，咁就會太冒進。
慕容小初