英超三支升班馬聯賽重未開齋，有博彩公司開出三隊齊降班賠率熱到唔夠三倍。不過，水晶宮領隊杜維降班都唔使驚，因為可能球會怕佢俾人撬，同佢簽咗四年合約，同西布朗嘅美臣真係天淵之別囉。
講到三隊季初表現，其實我求大俠覺得最有機會留班只得諾域治，西布朗嘅美臣早前俾球會發最後通牒，兩場唔贏就冇得留低；上周輸畀紐卡素，今周主場對保頓成為生死戰。反而，同樣唔被睇好留班嘅水晶宮，領隊杜維就接受咗會方開出續約四年，就算水晶宮真係降班都唔使驚咯。其實，我求大俠覺得西布朗人腳重好過水晶宮，美臣過去兩年幫西布朗組軍費煞思量，應該再畀多些少時間佢，如果佢真係同杜維命運咁迥異，都戥佢幾唔抵。
周一晚深夜場英超聯直播波，悶到抽筋；但比賽中有段小插曲，就幫我求大俠醒醒神。當地電視台攝影師忽然發現場上有塊隊長臂章，然後就影住查爾頓隊長傑利及布力般隊長巴利費格遜，兩個都冇跌到喎，咁呢塊第三隊長臂章，係邊個球員學人扮隊長，戴戴下跌咗呢？
馬德里體育會為咗令班球員傾力爭取好成績，承諾如攞到西甲冠軍，全隊有五百萬歐元（約四千八百萬港元）獎金，出線歐冠盃就有三百萬歐元，西班牙盃同歐協盃資格分別有二百萬歐元同一百五十萬歐元。所謂「重賞之下必有勇夫」，馬體會班球員由呢周開始，應會搏命。
愛華頓今屆英超開季打得好，五勝一和一負，𠵱家僅次於阿仙奴同車路士之後排第三，故佢哋主席簡威同領隊莫耶斯講，明年一月會攞三千萬鎊出嚟擴軍。但愛華頓負債纍纍，莫耶斯唔好諗住呢張支票一定兌現到，畀心機帶好隊波好過，而到時真有錢買人，咪當額外獎兵償囉。
曼聯隊長堅尼門前俾人掟燃燒彈，雖然堅尼同佢大緊肚嘅老婆以及四個仔女冇受傷，但就嚇餐死。消息指單嘢應該係敵對球迷做嘅，目的係想嚇堅尼，但堅尼出名脾氣唔好，成日同啲隔離鄰舍有衝突，近日重涉嫌毆打細路，話唔埋佢唔知得罪邊個惡人，俾人尋仇都未定。