油價持續上升，加上大摩睇淡晶片股兼預期油價升至61美元，嚇到美股跌破1萬點大關，美股收市後，油價在亞洲市升破50美元大關，市場似乎預咗周二晚美股持續下挫。
港股噚日一度連12900都守唔住，尾市反彈，收市報12950，跌71點，成交121.54億元。油價高企咗一段長時間，只係大漲小回，重未出現大調整，問題似乎愈來愈嚴重。
中國是世界工廠，搞工業嘅國企股盈利肯定受到油價高企影響。不過，國企指數兩隻重磅成份股中石油（857）及中石化（386）受惠於油價高企，中石油升1.86%至4.10元，中石化升1.62%至3.125元，所以國企指數只是微跌0.16%，收報4543。
藍籌股之一的中海油（883）亦升1.25%，收4.025元，成為穩定大市的主力。
國美（493）噚日有3億股大手成交上板，每股作價3.98元，相信荷銀已將3億股（其中6000萬股屬於空倉）國美以上限定價悉數配售出街。
國美復牌後股價受壓，全日跌5.32%，收報4.45元，成交金額高達12.9億元。至於最終配售股數係幾多，就要睇國美股價能否守於3.98元水平，以及荷銀要入市接番幾多貨。噚日阿虎見荷銀個牌接咗唔少貨，唔知係代客買定係荷銀自己要？
噚日有消息傳出，恒地（012）老闆四叔嘅私人公司恒基財經，對處理信達不良貸款資產有興趣，希望與銀建（171）一起玩，消息對銀建利好，股價進帳1%，收2.45元。
阿虎