今個月投資市場相當暢旺，噚日市傳華潤以約十三億三，割愛重建中嘅中環僑商大廈地盤。
華潤方面尚未證實，不過跑開呢單deal嘅經紀，話業主已經向佢哋證實賣出咗，包埋起樓，成交價十三億三左右，買家係本地財團。
個地盤位於皇后大道中九十二號，佔地萬一呎，以十五倍地積比率計，可建十六萬五千呎，上蓋仍未起好，按現有設計，最低幾層做商場，樓上寫字樓，樓面呎價大約八千。
經紀話，最值錢應該係商場部份，因為地盤喺正中區行人電梯口，不愁人流，行遠啲又有連卡佛，對面嘅中環街市遲吓發展埋，價值更可看高一線。
未來中環寫字樓新供應有限，租金可望回升至三十蚊呎，回報穩守四厘，呢類地盤買少見少，有投資價值。
樓市熱，代理行梗係好世界啦，對夥計都好識做，兩大集團中原同美聯，先後開腔，話派花紅畀後勤員工，噚日利嘉閣董事總經理何紹章透露，公司第三季利潤大增，決定十月份向後勤發放花紅，金額唔少於四分一個月。
今年三月，利嘉閣曾經派過一個月花紅，今次係第二次派。何紹章又重申承諾，若果今年累積盈利有一億，就向後勤派十個月花紅。咁利記員工好識做嘞。
噚日係人月兩團圓嘅中秋佳節，但社會上都有不幸嘅一群，值得大家關心。信和物業管理公司同「信和之友」組成嘅義工隊，一行五十人，擔任「愛心大使」，上個禮拜四，到仁濟醫院「社會服務部」轄下三間安老院，派發月餅同生果，畀超過五百位老人家。
晚上，又同超過一百名長者，上灣仔中環廣場七十五樓賞月，等佢哋可以感受到人間有情。
信和發展部執行董事余惠偉話，集團贊助嘅「月餅代表我的心」慈善活動，今年已經係第五年。
樓市旺，地產代理又立即應變，迅速擴張。
美聯物業副主席張錦成話，集團明年準備動用一千五百萬，開多五十間分行，短期內重會請多五百人，實行招兵買馬咁話。
佢話，九七年高峯期時，美聯物業只得二百九十間分行，今日連同香港置業，已有三百零二間，美聯就佔二百六十一間。市道係咪復甦，睇吓代理擴張速度應略知一二。
上個禮拜六，北京有個「2004中國10大新地標建築綜合體」評選，新世界中國上海香港新世界大廈及武漢新世界國貿大廈，齊齊上榜，認真罕見。
評選由「中國房地產TOP10研究組」做，成員包括國務院發展研究中心企業所、清華大學房地產研究所，以及搜房研究院。
評選標準分兩部份，一以物業建築面積、高度，租售情況來衡量，第二部份着重建築外貌、新材料與新技術應用，跟周邊建築物協調，城市區域文化體現，以及對城市區域經濟發展嘅帶動作用等。
後日十一國慶會大放煙花，除咗維港兩岸同山頂呢啲觀賞熱點，以煙花靚景做賣點嘅新盤，都係唔錯嘅選擇。西半山雍慧閣就趁呢個機會，當晚開放三十七樓，畀經中原嘅準買家，喺睇樓之餘順便欣賞埋煙花。
準買家唔使同人迫，發展商又可以推介吓樓盤嘅現場實景，一舉兩得。
中記話，之前有個買家，睇完現樓實景之後，就決定入市。今次加埋煙花滙演，唔使得個講字，可以親身體驗。如果真係因此做得成生意，中記應該多謝煙花滙演嘅主辦單位。
蘭西
電郵地址：
