黎明（Leon）噚日喺中環出席「公益金便服日」活動，有善長捐出十萬蚊要求黎明同乒乓孖寶打場友誼賽，由黎明夥拍高禮澤對李靜與柯清輝及陳祖澤，結果由黎明同高禮澤一隊勝出，喺比賽過程上只見黎明身手尚算唔錯，不過開波亦有落網。
第一次同呢對孖寶見面，Leon笑話都唔可以用較量嚟形容，又話因為前日先由新疆返港，所以事前唔知有呢個安排，冇得練習。另外，Leon都透露有問孖寶攞電話，佢話：「我得閒會同佢哋傾偈，叫佢哋過兩招必殺技，俾我可以贏助手。」Leon重話自己其實踢足球嘅技術都唔錯，其他運動好似滑水、羽毛球等都有番咁上下。
哥哥張國榮嘅外甥女麥家軒，都有代表律師樓出席公益金活動，不過佢就唔肯透露有關幫哥哥出紀念郵票嘅詳情。
另外，黎明前晚喺沙田運動場為《沙田月滿樂安居》節目綵排，問佢表演係唱現場定咪嘴，Leon即刻講大道理，佢話：「唱live要有充份嘅準備先唱到，唔好一知半解，如果身體健康，設備音響完善，唱到咪唱囉，唔係歌手唔想唱，歌手壓力都好大。」有人話其實好多新人冇條件唱現場，Leon話：「唔好咁評論新人，我Leon做新人時都超級差，歌手咪嘴係問心無愧㗎。」
吳日言同師兄麥浚龍（Juno）嚟緊會各自推出今年第二隻專輯，佢哋重分別請前組合Swing成員作曲填詞，吳日言就同郭偉亮拍檔，希望分頭出擊做出好成績。而吳日言作為新人，竟然可以喺一年內推出兩隻專輯，佢當然覺得開心，但係亦都有壓力。對於公司嘅支持，佢話無以為報，只能以後用好歌嚟報答公司喎。
梁靜茹早前為新曲《接受》拍攝MV，由於呢首歌係由前度男友阿管作詞，所以佢唱起來份外投入，一想起以往嘅感情時，梁靜茹就更加忍唔住，所以當導演要求佢喺MV內大哭一場時，佢竟然唔使滴眼藥水就可以喊到唔停。不過最難倒梁靜茹嘅係要喺鏡頭前面同兩個男仔左擁右抱，搞到佢好鬼尷尬喎。
歐陽震華（Bobby）噚日喺將軍澳電視廣播城，拍攝劇集《鴨寮下的金蛋》嘅宣傳片段，原來呢套劇會安排喺TVBE收費電視播映，唔會喺無綫播，所以吸納唔到廣泛嘅香港觀眾，實在有啲嘥料，但Bobby就話自己有另一個睇法，佢話：「都唔係嘅，唔好都唔會攞出嚟收錢啦。」
