做人最緊要好命，好似霍震霆公子咁，老竇叫做霍英東，真係一世無憂，競選議員有對手又點？霍公子照樣我行我素，走去希臘奧運會打氣兼頒獎，唔使辛苦周街拉票或者去論壇，咁又勝出，以八百票對林漢堅三百五十八票，你話係咪好命？
八方日前喺國慶酒會撞見霍公子，問起佢父親想發三千幾萬獎金畀啲奧運金銀銅牌得主進展如何，佢話重等候中央發落，但啲錢已經準備好，霍公子重提起佢剛剛見完特首董建華，同佢傾過業界各樣問題，希望有所改善。
八方見佢講得興致勃勃，就多口問佢有冇興趣選第三屆特首，點知霍公子一聽完條問題，當堂笑晒，話八方咁都問得出，即時彈開，猛話唔會，重急急腳走人㖭。唔通做特首真係咁得人驚？
（圖）包括霍公子（左四）在內嘅一班候任立法會議員噚日改着T恤，響應公益金便服日，但最養眼都應該係着短褲嘅余若薇（左二）同四個骨褲加拖鞋嘅蔡素玉（右四）。曾顯華攝
傳真︰2623-9278
電郵︰