退出立法會嘅司徒華，會寫番本回憶錄，華叔其實已有腹稿，諗好結構。華叔同八方講，佢嘅回憶錄會分四部份，第一部份係「多情應笑我」，主要講佢個人經歷。第二部份「捲起千堆雪」，集中講從政所見所聞。第三部份「挑燈看劍」，分享工作經驗。壓軸章「青山多嫵媚」，寫佢身邊熟識嘅人，又搵識佢嘅人寫吓，自己喺人哋眼中究竟係點嘅一個人。
華叔話，預咗要用幾年時間寫，因為佢冇寫日記嘅習慣，好多資料要查，好多朋友話幫佢，城大嘅馬家輝重話要同佢整番本英譯本，又有報館同佢講，可以搵個記者跟住華叔幫手寫，不過佢已婉拒各方好意，自己執筆。
華叔近日忙於結束佢嘅地區辦公室同遣散職員。佢同八方講，冇做議員之後，忽然多咗好多人喺街度同佢握手，而胃口亦好咗，就算好大份早餐佢都食得晒，不過醫生曾經勸佢要keepfit，因為太重對條腰唔好，所以由兩年前開始，每日晏晝如果冇應酬就只食一個橙，夜晚先至食番多啲嘢。
最近成日去大學演講，華叔有感而發，佢雖然冇讀過大學，如果用社會經驗嚟比較，七三年嘅罷課等同一個學士學位，而佢一手一腳湊大教協，就係佢嘅博士論文；有啲人眼紅教協，話教協淨係識搞福利畀會員，但其實淨係搞福利一環，都有好多學問。
傳真︰2623-9278
電郵︰