會計H有匹新馬到港，佢話贏得之時就會通知聲，真係多謝晒，通常新馬贏得之時馬主好少買中，聽馬主貼士，風險甚大。
會計H嘅其他貼士，反有參考作用。會計H話：「慘咯，做得嘢嘅夥計，今年走咗六七件。一位小姐，去年底月薪萬八，今年六月，我加到佢兩萬六，點知昨日遞信，話另有高就，去Big4做經理喎。我話再加佢人工，佢都唔肯，講明要去大行學嘢，貪佢名氣大，以後再轉工會好容易。咁搞法，你話我哋啲中型會計師行點捱吖，真係做到自己都死咗。」
唔怪得會計H個二仔讀緊會計系，快啲畢業就可以幫輕爹哋。問會計H：「邊類人最搶手？」佢話：「當然係中級人員啦，大學畢業，做咗三四年，啱啱考到會計師牌，能獨立上大陸工作嗰種。呢類人個個搶住要，四大啦、客戶啦，其他中小會計師樓啦。呢啲人跳槽最容易，月薪三萬或以上。」會計行業人手短缺，愈來愈緊張，充份反映經濟好轉。會計H認為會計行業係領先指標，工商客戶一旦肯投資，擴大生意，第一件事就係搵會計加強財務管理，搞好啲融資先。會計發到咁上下，市場推廣、營銷人員就開始渴市。因是之故，會計H對未來經濟好樂觀，只係驚搵唔夠夥計啫。
不過會計H積多年經驗，對內地民企敬而畏之，絕不買民企股票。佢話：「如果我貪做生意，呢兩年已經死咗幾次，唉，一睇啲數就知道唔多掂，騰達智能案係最好教材，非常合乎現實環境㗎，夠膽同佢哋核數，簽名落去，我好佩服某些人嘅勇氣。」