港股跌勢持續，萬三關一度失守，重落到12900才定得住，午後反彈，收13021，跌44點，但期指臨尾又再質過，低收12938，大低水83點，今日期指結算，淡友仍會施壓。
大市調整，國企則逆流而上，成為市場焦點所在。國指收4551，升12點，最突出仍然係原料同資源股，早輪推介嘅燕化（325），升勢最勁，高收3.125元，大升4.1%，破埋呢個位嘅徘徊區阻力，照度上去，起碼見3.6元。中鋁（2600）收4.8元，升5仙。3隻鋼鐵股俱報升，鞍鋼（347）帶頭搶出，高收3.6元，升2.1%；重鋼（1053）同馬鋼（323）俱升5仙，升幅1.5%。3股近日走勢都係形成旗形整固，成交已大幅減縮，只要一衝破上阻力，量度升幅起碼有15%至20%。
大行現水平重係不斷收集鋼鐵股，3隻之中，最明顯都係馬鋼。近日鋼材價格回升之勢好急，大行家吓重上車，後市真係睇得好好。
馬鋼04年（12月年結）上半年營業額128億元（人民幣．下同），升81%，獲利23.16億元，升150%，比市場預測為佳。雖然第2季盈利只得8.03億元，遠低於首季的15.13億元，但由於鋼鐵行業最黑暗時刻已過去，下半年應可由第2季的低位回升，保守估計為20億元，令全年盈利去到43億元，每股盈利66.5仙，（折62.7港仙）。大行出報告推介，目標價為4港元，預測PE亦只係6.4倍。
銀建（171）自宣布以筍價收購不良資產後，股價升勢只係曇花一現，跟住重跌到2.35元先反彈（最主要原因相信係同2.2元的換股價有關），噚日升番上2.425元，相信跌勢已告一段落，中線嚟睇，銀建應該係一隻可食大茶飯的股票，不要錯過。
銀建買咗569億元人民幣不良資產後，又有消息話正在洽購緊另一單總值達1500億元人民幣嘅不良資產，但數額太大，可能會同財團合作。早幾日計過，銀建食咗569億元個「包」，未來3年有機會年賺7億元，若再食埋1500億元個「大包」，每年起碼再多賺幾億元。銀建市值只係36億元，保守估計每年賺12億元，PE只係3倍！股價升一個開，PE亦只係6倍！
郭兆誠