許冠傑（Sam）下月舉行的演唱會，加場門票昨日公開發售，阿Sam特別與官恩娜到尖沙嘴慰問排隊買飛的fans，其間阿Sam更在街頭向fans獻吻，而歌迷則送上孖煙囱。
許冠傑（Sam）下月紅館演唱會將加開兩場共開十場，加場門票昨日發售，由於今次是阿Sam演唱會最後一次公開賣飛，昨早他特別與官恩娜到其中一個售票地點尖沙嘴文化中心派飲品及絲巾，雖然昨日各售票站只得二十多人排隊，但仍有不少fans提早四日前來。
昨日上午十時許，阿Sam乘坐保母車抵達尖沙嘴碼頭落客區，由於他遲遲未下車，而座駕在不准停車等候的落客區停了足足半小時，結果交通警上前驅趕，連歌神也不能例外。阿Sam及後拖着戴上印第安人頭飾的官恩娜下車，並拿着咪打招呼：「Hello，齊人未？呢個係Ella官恩娜，大家認唔認得佢，今日佢係紅番公主，同我一齊派絲巾！」
阿Sam下車後與官恩娜在尖沙嘴鐘樓一帶派絲巾及飲品，又拿着咪清唱《繼續微笑》，吸引大批途人圍觀，就連在紅館排隊買票的fans，也跑來一睹阿Sam風采。不過由於有不少人搶絲巾及飲品，場面一度混亂，有fans更因拿不到絲巾而拍打官恩娜，亦有人因為搶不到禮物而爆粗。
阿Sam說：「我有少少唔捨得，因為出年book唔到期，真係激死，出年見唔到你哋。」及後fans送上豹紋孖煙囪，逗得阿Sam開心不已，當阿Sam準備道別時，有女fans忽然衝上前向阿Sam索吻，另一男fans見狀亦不甘示弱，要求阿Sam獻吻。
然而，有人質疑阿Sam昨日活動事前未經申請實屬違法，對此演唱會製作人丘亞葵說：「阿Sam都係打個招呼，我諗唔怕嘅。」
採訪、攝影：馮美茵
