新婚未幾變喪妺
Britney率踢拖奪命黨潑奶昔

啱啱第二次結婚嘅美國女歌手BritneySpears，早幾日為咗避開狗仔隊嘅追蹤，竟然同個妹及兩個朋友，戴住《奪命狂呼》嘅殺手面具出街，佢哋嘅行徑咁出位，梗係俾狗仔隊認出啦，Britney重發爛渣用奶昔潑記者㖭。
雖然距離萬聖節重有成個月，但Britney前幾日約埋阿妹JamieLynn同兩個同性朋友去快餐店醫肚嗰陣，四位喪妹就搞到慶祝萬聖節咁，每個人都笠住個《奪命狂呼》殺手面具，雖然Britney阿媽都有一齊出嚟，但就冇同佢哋癲埋一份，只係充當司機啫。

結婚當食生菜
呢班「踢拖奪命黨」又真係幾嚇人，事關佢哋差唔多個個着住短褲同拖鞋行出嚟，十足街頭童黨咁，難怪Britney呢次荒謬嘅「奪命」行動，引起咗一班狗仔隊嘅注意。因為食得太多快餐搞到肥晒嘅Britney，俾人識穿身份之後，更加將手上嘅奶昔潑向記者。
Britney個老公KevinFederline，近排亦俾記者睇到佢食咗唔少漢堡包同快餐，搞到個肚腩都凸晒出嚟。外間亦唔睇好佢同Britney嘅婚姻，原來Kevin嘅屋企人向來都成日離婚同結婚，又生埋好多細路，完全唔注重傳統嘅家庭觀念。