個市唔算弊傢伙，恒指萬三失而復得。油價急升困擾人心，一旦回頭，全球股市都有機會上番。國內股市微軟，但揸重國內股票嘅3隻保險股，全部喺低位時有盤收貨，埋單隻隻都有1格進帳，佢哋啲C輪可以吼吓。人保（2328）C輪一係X輪，一係數據唔靚，只宜吼正股。
平保C輪：平保（2318）低見11.15元後跳番上11.40元收市，反跌為升，成交量由12球縮到7.1球，冇乜沽壓。芬佬買盤加些少力度，隨時有機重見上周一11.85元高位。揀平保C輪炒，正路之選係2288，壽命特長，明年7月先至到期，輪價17.6仙，溢價7.5%，槓桿率6.5倍（有效4.4倍），引伸波幅32%。2238數據都靚，不過嫌交投太疏，買賣唔貼價，唔啱炒上炒落。
國壽C輪：國壽（2628）最低4.80元，收市4.925元，沽盤力度又係好細，成交量由79.8球減到37.9球。上周二高位5.25元，相信唔使太耐會見番。搵國壽C輪炒，主角係9231，11月到期，輪價52仙，溢價4%，槓桿率9.5倍（有效6.3倍），引伸波幅53%。另外隻2143，明年1月底到期，輪價23.6仙，溢價10.4%，槓桿率20.9倍（有效8.5倍），引伸波幅35%，買賣節奏明快，啱炒上炒落。
新地C輪：新地（016）最低72元，收73元，只微跌1格。派成績表後，跌到最低計，日幾之內大散4元，反彈都好應該，短炒C輪，揀9738，12月尾到期，輪價34仙，溢價4.5%，槓桿率21.5倍（有效10.7倍），引伸波幅27%。其次可揀2249。
章盛