中秋夜揸車曬月光，首選屯門龍鼓灘，吹風吹水過後可到灘旁的燒烤場BBQ；次選馬鞍山郊野公園，人在高崗月色份外明；三選南區舂坎角炮台，人少寧靜月夜抱佳人唔使怕醜，要幾浪漫有幾浪漫！
記者：鄭達基 攝影：陳陶鈞
模特兒：Nick、Cissy（天一）
鳴謝：萬事得汽車（28931112）
駕車兜風曬月光，推介屯門龍鼓灘，一來人少，二來有無敵大海景，三來有BBQ場。這天，Nick駕香車載美人Cissy到龍鼓灘，到達時間尚早，把開篷車泊在海邊後，先來個浪漫沙灘踢水看日落，再浪漫完參觀沙埔崗天后古廟，然後行323級梯階登山頂中華白海豚瞭望亭看海景，大飽眼福！
重回龍鼓灘，指定節目玩燈籠、吃月餅，曬夠月光再駕車到鄰近的燒烤場BBQ，燒烤場有免費停車場好方便。燒烤賞月，自助任食，剛才半個月餅未飽肚，Nick豬扒、雞扒、香腸、牛丸一碟二碟的捧回來，滿載而歸；二人兩手雙叉，邊燒烤邊談情，食物未塗蜜糖，已經甜到漏。
芭堤雅燒烤樂園（26138083）
地址：屯門龍鼓灘路136地段
免費車位：200個
收費：場內區成人$80，小童及長者$40；海邊區成人$85，小童及長者$40，各包1罐汽水及1支蒸餾水。
點樣去：屯門公路左轉皇珠路及龍富路，接龍門路及龍鼓灘路，過龍鼓灘巴士總站旁燈位左轉入停車場。
留意：龍門路及龍鼓灘路多重型車輛行走，部份路段有急彎，小心行車。
嫌屯門遠，馬鞍山郊野公園也是個好選擇。公園有大空地泊車，乾淨少蚊，燒烤爐、野餐枱櫈、洗手間、涼亭一應俱全，加上地勢高，與明媚月色份外接近，適合一家大細驅車同遊。
點樣去：馬鞍山路至近恒安邨迴旋處，選擇通往馬鞍山村出口，再沿良友路前行到達馬鞍山郊野公園。
留意：良友路部份路段沒有街燈、有道路工程兼屬單線雙程行車，謹記慢駛。
驅車往港島南區舂坎角公園人少夠靜，曬月光亦不俗！公園有當年駐港守軍主要陣地的半圓形炮台，對出無敵大海景勁好View，入炮台可透過天窗賞月，沿旁邊階梯往下走到探射燈台，這裏有野餐枱櫈和燒烤爐，風景更好。
點樣去：大潭道及赤柱峽道轉入舂坎角道，經慈氏護養院前走路盡頭便可。
留意：部份路段屬單線雙程行車，小心對頭車。
