一話有得上京觀禮，特區上下十分雀躍，八方日日追問二百多人觀禮團名單，特首辦都話未掂。據聞，到最後又係同五年前慶祝國慶五十周年一樣，留番梁愛詩一個司長喺香港睇場。
詩姐份人永遠都好抵得諗，佢既冇政治野心，又唔需要同胡溫握手示好，黨中央既然要煲呔同唐唐都出現，一切梗係以中央指示行事，唐唐都冇得sayno，佢噚日帶埋老婆仔女上京，實行係北京賀中秋，等班細佬感受吓祖國情喎。
今次上京肯定有特別意義，老胡𠵱家做埋軍委會主席，集黨政軍權於一身，一定有嘢想講，班大粒佬好似李嘉誠、吳光正、郭家公子、何鴻燊同胡應湘等一定有資格上京，最後胡錦濤會否分別接見佢哋就未知，但八方聽聞，老董已經接旨，胡主席會單獨見佢，凶吉未卜。
煲呔又已經放完假返工，有得見領導，佢梗係唔執輸，問佢會唔會延長政改諮詢期，曾辦話諗緊，遲吓話畀八方知。
傳真︰2623-9278
電郵︰